India vs West Indies: ప్రపంచ టెస్టు చాంపియన్‍షిప్ ఫైనల్‍లో టీమిండియా ఘోరంగా ఓడిపోవటంతో.. జట్టులోని సీనియర్ ప్లేయర్ల భవితవ్యంపై చాలా ప్రశ్నలు తలెత్తుతున్నాయి. ఈ తరుణంలో కొందరు యువ ఆటగాళ్ల పేర్లు తెరపైకి వస్తున్నాయి. భారత జట్టు.. జూలైలో వెస్టిండీస్ పర్యటనకు వెళ్లనుంది. ఆ టీమ్ తో రెండు టెస్టులు, మూడు వన్డేలు, ఐదు టీ20ల సిరీస్‍లు ఆడనుంది. అయితే, ఈ పర్యటనకు టీమిండియాలోకి యువ ఆటగాళ్లను తీసుకోవాలంటూ కొందరి పేర్లను పలువురు మాజీలు సూచిస్తున్నారు. తాజాగా భారత మాజీ ఓపెనర్ వసీం జాఫర్ కూడా నలుగురు యువ ఆటగాళ్ల పేర్లు చెప్పాడు. వారిని వెస్టిండీస్ పర్యటనలో వన్డేలు, టీ20లకు ఎంపిక చేయాలని బీసీసీఐకు సూచించాడు.