75ఏళ్లు పూర్తి చేసుకొని 76వ వసంతంలోకి అడుగుపెట్టిన ఏపీ సీఎం చంద్రబాబునాయుడు పేరుతో పార్టీ శ్రేణులు, అభిమానులు సంబురాలు జరుపుకున్నారు. అదే విధంగా సేవ కార్యక్రమాలు చేపట్టారు. ఇందులో భాగంగానే భాష్యం విద్యాసంస్థల చైర్మెన్ శ్రీ భాష్యం రామకృష్ణ కుటుబం సభ్యులు ఉదయం విఐపీ విరామ సమయంలో శ్రీవారి సేవలో పాల్గొని మొక్కులు చెల్లించుకున్నారు. దర్శనానంతరం ఆలయ రంగనాయకుల మండపంలో వేదపండితులు ఆయనకు వేదాశీర్వచనం అందించగా, ఆలయ అధికారులు శ్రీవారి తీర్థప్రసాదాలు అందజేసి పట్టువస్త్రంతో సత్కరించారు. అనంతరం ఆలయం వెలుపల మీడియాతో మాట్లాడిన రామకృష్ణ, ఆంధ్రప్రదేశ్ ముఖ్యమంత్రి నారా చంద్రబాబు నాయుడు జన్మదినోత్సవం సందర్భంగా స్వామివారిని దర్శించుకున్నట్లు తెలిపారు. చంద్రబాబు నాయుడిపై శ్రీవారి కృపాకటాక్షాలు ఎల్లప్పుడూ ఉండాలని ప్రార్థించానని చెప్పారు.

అదేవిధంగా భక్తులకు నిత్యం అందించే అన్నప్రసాద సేవలో భాగంగా ఒక్కరోజు అన్నప్రసాద వితరణకు అయ్యే రూ.44 లక్షలను భాష్యం విద్యాసంస్థల తరఫున శ్రీ తరిగొండ వెంగమాంబ అన్నప్రసాదానికి విరాళంగా అందజేస్తున్నట్లు వెల్లడించారు.ఇక తిరుమలలో భక్తుల రద్దీ సాధారణంగా కొనసాగుతోంది. ఇప్పుడే కాదు యువనాయకుడు, మంత్రి, టీడీపీ వర్కింగ్ ప్రెసిడెంట్ నారా లోకేష్ పుట్టిన రోజు సందర్భంగా కూడా గతంలో ఒకరోజు అన్నవితరణ ఖర్చు రూ.44 లక్షల చెక్కును టీటీడీ చైర్మెన్‌కి అందజేశారు రామకృష్ణ. ఇక వీరితో పాటు తిరుమల శ్రీవేంకటేశ్వర స్వామివారిని సోమవారం పలువురు ప్రముఖులు దర్శించుకున్నారు.

సోమవారం శ్రీవారిని మొత్తం 76,406 మంది భక్తులు దర్శించుకోగా, వారిలో 28,463 మంది తలనీలాలు సమర్పించారు. హుండీ ఆదాయం రూ.3.45 కోట్లకు చేరుకుంది. భక్తుల రద్దీని దృష్టిలో ఉంచుకుని తిరుమలలో ప్రస్తుతం 8 వెయిటింగ్ కంపార్ట్‌మెంట్లు నిండిపోయాయి. సర్వదర్శనానికి ఎస్‌ఎస్‌డీ టోకెన్లు లేకుండా వచ్చిన భక్తులకు సుమారు 6 గంటల సమయం పడుతోందని అధికారులు తెలిపారు. భక్తులందరికీ సౌకర్యవంతమైన దర్శనం కల్పించేందుకు టీటీడీ అన్ని ఏర్పాట్లు చేసింది.