దీంతో నదీ దిగువ ప్రాంతాల్లో ఆకస్మిక వరదలు (ఫ్లాష్ ఫ్లడ్స్) ముంచెత్తే ప్రమాదం ఉందని భావించిన అధికారులు ప్రజలను అప్రమత్తం చేశారు. న్యూస్18 ఇంగ్లీష్ కథనం ప్రకారం.. అపీ హిమాల్ రూరల్ మున్సిపాలిటీ పరిధిలోని భట్టార్ ప్రాంతంలో ఈ భారీ కొండచరియలు విరిగిపడ్డాయి. కొండల నుంచి భారీగా వచ్చిపడిన రాళ్లు, మట్టి, వ్యర్థాలు చౌలానీ నదిలో పేరుకుపోయి నీటి సహజ ప్రవాహానికి తీవ్ర ఆటంకం కలిగించాయి. మరిన్ని కొండచరియలు విరిగిపడితే నది పూర్తిగా మూసుకుపోయే ప్రమాదం ఉందని, ఆ తర్వాత ఒక్కసారిగా ఆకస్మిక వరదలు దిగువ ప్రాంతాలను ముంచెత్తే అవకాశం ఉందని దార్చులా జిల్లా యంత్రాంగం హెచ్చరించింది. నదీ తీర ప్రాంతాల్లో నివసించే ప్రజలు తగిన జాగ్రత్తలు తీసుకోవాలని, అత్యవసర సమయాల్లో సురక్షిత ప్రాంతాలకు తరలివెళ్లేందుకు సిద్ధంగా ఉండాలని సూచించారు.