ఉదయం వేళ లేత సూర్యకిరణాల వెలుగులో శ్రీదేవి, భూదేవి సమేత శ్రీమలయప్పస్వామి వారి ఊరేగింపు నయనానందకరంగా సాగింది. స్వామివారు ఈరోజు గోవుల గోపన్న అలంకారంలో భక్తులకు కనువిందు చేశారు. ముద్దులొలికే కృష్ణయ్య రూపంలో, ఆవుల మందల మధ్య కొలువుదీరినట్లుగా ఉన్న స్వామివారి అలంకరణ చూసేందుకు రెండు కళ్లు చాలవన్నట్లుగా ఉంది. నాలుగు తిరుమాడ వీధుల్లో అత్యంత వైభవంగా సాగిన ఈ కల్పవృక్ష వాహన సేవను తిలకించేందుకు భక్తులు బారులు తీరారు. అడుగడుగునా కర్పూర హారతులు సమర్పిస్తూ స్వామివారికి నీరాజనాలు పలికారు. అశేష జనవాహిని నడుమ స్వామివారి రథం రాజసంగా ముందుకు కదిలింది.

శ్రీవారి కల్పవృక్ష వాహన సేవలో పలువురు ప్రముఖులు, టీటీడీ ఉన్నతాధికారులు విశేషంగా పాల్గొన్నారు. తిరుమల శ్రీశ్రీశ్రీ పెద్దజీయర్‌స్వామి, శ్రీశ్రీశ్రీ చిన్నజీయర్‌స్వామి వారు ఈ దివ్య కార్యక్రమంలో పాల్గొని స్వామివారికి ప్రత్యేక పూజలు సమర్పించారు. టీటీడీ ఈవో శ్రీ ముద్దాడ రవిచంద్ర, పలువురు ధర్మకర్తల మండలి సభ్యులు, అదనపు ఈవో శ్రీ సిహెచ్ వెంకయ్య చౌదరి, సీవీఎస్వో శ్రీ మురళీకృష్ణ తదితరులు స్వామివారి దర్శనం చేసుకున్నారు. పటిష్టమైన భద్రతా ఏర్పాట్ల నడుమ అధికారులు ఎప్పటికప్పుడు పరిస్థితిని సమీక్షిస్తూ ఈ వాహన సేవ అత్యంత ప్రశాంతంగా, దిగ్విజయంగా ముగిసేలా పర్యవేక్షించారు.