సియాసాత్ కథనం ప్రకారం.. మదీనాగూడలోని ప్రసిద్ధ ‘బహార్ కేఫ్’లో వంటగది నిర్వహణను తక్షణమే నిలిపివేయాలని అధికారులు ఆదేశించారు. ఇక్కడ వంటగది పైకప్పు అత్యంత మురికిగా ఉండటంతో పాటు సరైన వెలుతురు లేదు. ఆహార వ్యర్థాలు నిండిన బహిరంగ డ్రైనేజీలు, నీరు నిలిచిపోయిన వాష్ ఏరియా దర్శనమిచ్చాయి. వంట చేసే ప్రదేశానికి సమీపంలోనే సిబ్బంది మరుగుదొడ్డి ఉండటం, దాని తలుపులు తెరిచి ఉంచడం అత్యంత నిర్లక్ష్యానికి అద్దం పడుతోంది. అరిగిపోయిన చాపింగ్ బోర్డులు, ఇనుప కత్తులు వాడుతున్నట్లు గుర్తించారు. ఆహార పదార్థాలపై ఎలాంటి లేబుల్స్ లేకపోవడంతో పాటు సిబ్బంది మెడికల్ ఫిట్‌నెస్, వాటర్ టెస్టింగ్ రికార్డులు లేకపోవడంతో యాజమాన్యానికి షోకాజ్ నోటీసు జారీ చేశారు.

ఈ మూడు రెస్టారెంట్లలోనూ స్వచ్ఛమైన తాగునీటిని ధృవీకరించే వాటర్ టెస్టింగ్ రిపోర్టులు, సిబ్బంది ఆరోగ్య పరిస్థితిని తెలిపే మెడికల్ రికార్డులు లేకపోవడం గమనార్హం. ప్రజలు డబ్బులు చెల్లించి అనారోగ్యాన్ని కొనితెచ్చుకునేలా ఈ హోటళ్ల నిర్వాహకులు వ్యవహరిస్తున్న తీరుపై ఫుడ్ సేఫ్టీ అధికారులు తీవ్ర ఆగ్రహం వ్యక్తం చేశారు. తక్షణమే కిచెన్లలో పారిశుధ్యం మెరుగుపరుచుకోవాలని, లేనిపక్షంలో లైసెన్సులు రద్దు చేస్తామని కఠినంగా హెచ్చరించారు. ఆహార భద్రతా ప్రమాణాలను పాటించని హోటళ్లపై ముందు ముందు కూడా ఇలాంటి ఆకస్మిక దాడులు కొనసాగుతాయని స్పష్టం చేశారు.