ఈ టోర్నీలో హిమతేజ బ్యాటింగ్ గణాంకాలు అబ్బురపరుస్తున్నాయి. ఏకంగా 186 స్ట్రైక్ రేట్‌తో చెలరేగుతూ లీగ్‌లో ఇప్పటివరకు మొత్తం 430 పరుగులు సాధించి టోర్నీలోనే అత్యధిక పరుగులు చేసిన బ్యాటర్‌గా ‘ఆరెంజ్ క్యాప్’ సొంతం చేసుకున్నాడు. హిమతేజ తర్వాతి స్థానంలో హైదరాబాద్ ఈ-ఛాంపియన్స్ ఆటగాడు అభిరథ్ రెడ్డి 379 పరుగులతో రెండో స్థానంలో కొనసాగుతున్నాడు. ఆ తర్వాత వరంగల్ వారియర్స్ సభ్యుడు అమన్ రావు 266 పరుగులతో, నల్గొండ నైట్స్ ఆటగాడు గౌరవ్ రెడ్డి 258 పరుగులతో, మెదక్ ఫాల్కన్స్ బ్యాటర్ విక్రమ్ నాయక్ గుగులోత్ 245 పరుగులతో తదుపరి స్థానాల్లో నిలిచారు. ఈ లీగ్‌లో పరుగుల కోసం వీరంతా తీవ్రంగా పోటీ పడుతుండటం టోర్నీకి మరింత శోభను తీసుకొచ్చింది.

గ్రామీణ, పట్టణ ప్రాంతాల్లో దాగి ఉన్న క్రీడా నైపుణ్యాన్ని వెలికితీయాలన్న సదుద్దేశంతో హైదరాబాద్ క్రికెట్ అసోసియేషన్ (హెచ్‌సీఏ) గత నెల 21వ తేదీన ఈ టీజీ 20 లీగ్‌ను అట్టహాసంగా ప్రారంభించింది. ఇందులో మొత్తం ఎనిమిది జట్లు టైటిల్ కోసం తలపడుతున్నాయి. పాలమూరు స్ట్రైకర్స్, అన్విత ఖమ్మం ఏసెస్, రంగారెడ్డి రైజర్స్, నల్గొండ నైట్స్, వరంగల్ వారియర్స్, మెదక్ ఫాల్కన్స్, కరీంనగర్ డైమండ్స్, హైదరాబాద్ ఈ-ఛాంపియన్స్ జట్లు హోరాహోరీగా పోటీ పడుతున్నాయి. లీగ్ దశ నుంచి ప్లేఆఫ్స్ వరకు సాగే ఈ టోర్నమెంట్ తుది పోరు ఈ నెల 12వ తేదీన హైదరాబాద్‌లోని ఉప్పల్ రాజీవ్ గాంధీ అంతర్జాతీయ స్టేడియంలో జరగనుంది. ఫైనల్ మ్యాచ్ కోసం అభిమానులు ఆసక్తిగా ఎదురుచూస్తున్నారు.