రాష్ట్ర పోలీసు శాఖ ఉన్నతాధికారుల ఆదేశాల మేరకు తిరుపతి జిల్లా ఎస్పీ ఎల్. సుబ్బరాయుడు పర్యవేక్షణలో డ్రగ్స్‌పై ఉక్కుపాదం మోపుతున్నారు. రేణిగుంట డీఎస్పీ వై. శ్రీనివాసులు మార్గదర్శకత్వంలో, రేణిగుంట అర్బన్ సీఐ ఎస్. జయచంద్ర ఆధ్వర్యంలో ఒక ప్రత్యేక పోలీసు బృందం నిఘా వ్యవస్థను ముమ్మరం చేసింది. ఈ నెల 9వ తేదీన రేణిగుంట రైల్వే స్టేషన్ సమీపంలోని ఖాళీ పార్కింగ్ ప్రదేశంలో ముగ్గురు వ్యక్తులు అనుమానాస్పదంగా సంచరిస్తున్నారు. వారిని గమనించిన పోలీసులు అదుపులోకి తీసుకుని క్షుణ్ణంగా తనిఖీ చేయగా అసలు గుట్టు రట్టయింది. బెంగళూరు నుంచి ఈ డ్రగ్స్‌ను తీసుకువచ్చి తిరుపతి, రేణిగుంట పరిసర ప్రాంతాల్లో విక్రయిస్తున్నట్లు విచారణలో నిందితులు అంగీకరించారు.

నిందితులు ఇచ్చిన సమాచారంతో పోలీసులు తదుపరి చట్టపరమైన చర్యలు వేగవంతం చేశారు. పట్టుబడిన ముగ్గురిపై ఎన్‌డీపీఎస్ చట్టం–1985 కింద కఠినమైన సెక్షన్లతో కేసు నమోదు చేశారు. విచారణ అనంతరం వారిని న్యాయస్థానం ముందు హాజరుపరిచి, కోర్టు ఆదేశాల మేరకు రిమాండ్‌కు తరలించినట్లు పోలీస్ ఉన్నతాధికారులు అధికారికంగా వెల్లడించారు. జిల్లా వ్యాప్తంగా మాదకద్రవ్యాల మూలాలను ఛేదించడానికి తమ బృందాలు నిరంతరం శ్రమిస్తున్నాయని, అక్రమార్కులపై కఠిన చర్యలు తప్పవని అధికారులు ఈ సందర్భంగా స్పష్టం చేశారు.