నిజానికి స్క్రిప్ట్ వర్క్ దశలో ఈ సినిమాను ఒకే భాగంగా రూపొందించి విడుదల చేయాలని ప్లాన్ చేశారు. కానీ అట్లీ రాసుకున్న కథా నేపథ్యం, దాని స్పాన్ చాలా పెద్దది కావడం.. దానికి తోడు భారీ బడ్జెట్, హై-ఆక్టేన్ యాక్షన్ సీక్వెన్స్ లు ఉండటంతో ఈ కథను ఒకే పార్టులో చెప్పడం కష్టమని దర్శకుడు భావించారట. కంటెంట్ డిమాండ్ మేరకు సినిమాను ‘బాహుబలి’, ‘కేజీఎఫ్’, ‘పుష్ప’, ‘సలార్’ తరహాలో రెండు భాగాలుగా విడుదల చేస్తే బాగుంటుందనే ప్రతిపాదనను అల్లు అర్జున్, నిర్మాత కళానిధి మారన్ ముందు అట్లీ ఉంచారు. దీనిపై సుదీర్ఘంగా చర్చించిన తర్వాత, రెండు పార్టుల ఐడియాకు వారిద్దరూ పచ్చజెండా ఊపినట్లు తెలుస్తోంది.

పాన్ ఇండియా అప్పీల్ కోసం ఈ సినిమాలో స్టార్ కాస్టింగ్‌ను తీసుకుంటున్నారు. ఇప్పటికే బాలీవుడ్ స్టార్ హీరోయిన్ దీపికా పదుకొనే (Deepika Padukone) మెయిన్ లీడ్‌గా కన్ఫర్మ్ కాగా.. కథలోని ఇతర కీలక పాత్రల కోసం రష్మిక మందన్నా, మృణాల్ ఠాకూర్, జాన్వీ కపూర్ వంటి పాన్ ఇండియా స్టార్స్ పేర్లు బలంగా వినిపిస్తున్నాయి. వీరిపై త్వరలోనే అధికారిక ప్రకటన వచ్చే అవకాశం ఉంది.