గత బుధవారం సోషల్ మీడియాలో 24 సెకన్ల నిడివి గల ఒక వీడియో క్లిప్ వైరల్‌గా మారింది. ఆ వీడియోలో ఒక మైనర్ బాలుడు ఓపెన్-టాప్ ఎమ్‌జీ సైబర్‌స్టర్ కారును వేగంగా నడుపుతుండగా, అతని పక్క సీట్లో కూర్చున్నతండ్రి చేతులు పైకెత్తి సైగలు చేస్తూ కనిపించాడు. ఈ చట్టవిరుద్ధమైన చర్యను గమనించిన పలువురు నెటిజన్లు, నిందితులపై కఠిన చట్టపరమైన చర్యలు తీసుకోవాలంటూ హైదరాబాద్ ట్రాఫిక్ పోలీసులను ట్యాగ్ చేస్తూ పోస్టులు పెట్టారు. దీనిపై తక్షణమే స్పందించిన రాజేంద్రనగర్ ట్రాఫిక్ పోలీసులు, ఒక ప్రత్యేక బృందాన్ని రంగంలోకి దించి దర్యాప్తు చేపట్టారు.

ట్రాఫిక్ ఇన్‌స్పెక్టర్ చల్లా రాజు తెలిపిన వివరాల ప్రకారం.. పోలీసులు సదరు వాహనాన్ని గుర్తించి, టోలిచౌకికి చెందిన కన్‌స్ట్రక్షన్ వ్యాపారవేత్తను, కారు నడిపిన అతని 11 ఏళ్ల కుమారుడిని అదుపులోకి తీసుకున్నారు. అనంతరం వారిని రాజేంద్రనగర్ లా అండ్ ఆర్డర్ పోలీసులకు అప్పగించారు.

పోలీసుల విచారణలో నిందితులు ఈ ఉల్లంఘనకు పాల్పడినట్లు అంగీకరించారు. ఈ ఘటన నిజానికి మార్చి 8వ తేదీనే జరిగిందని, అయితే ఈ చట్ట ఉల్లంఘనకు సంబంధించిన వీడియో క్లిప్‌ను జూన్ 11న సోషల్ మీడియాలో అప్‌లోడ్ చేయగా, అది జూన్ 17న పోలీసుల దృష్టికి వచ్చిందని వారు వెల్లడించారు.