కొంతకాలం బాగానే ఉన్నప్పటికీ, వీరి మధ్య మనస్పర్థలు రావడంతో గొడవలు ప్రారంభమయ్యాయి. సదరు మహిళ తన నుంచి దూరంగా ఉండటాన్ని భరించలేకపోయిన ఉదయ్ కృష్ణారెడ్డి.. తీవ్రస్థాయిలో ఆగ్రహానికి గురయ్యాడు. తాను ఆత్మహత్య చేసుకుంటానని బెదిరించడమే కాకుండా, ఆయుధాలు చూపి ఆమెను భయభ్రాంతులకు గురిచేసే ప్రయత్నం చేశాడు. సదరు మహిళా అధికారిణిపై అసత్య ప్రచారాలు చేస్తూ ఆమె వ్యక్తిత్వాన్ని, గౌరవాన్ని భంగపరిచేలా ప్రవర్తించాడు. ఇతడి చేష్టలు భరించలేక సదరు మహిళ మరొకరిని వివాహం చేసుకుంది. పెళ్లి తర్వాత కూడా ఉదయ్ వైఖరిలో మార్పు రాలేదు. సోషల్ మీడియా వేదికగా మరింతగా మానసిక వేధింపులకు గురిచేయడం మొదలుపెట్టాడు.

వేధింపులు భరించలేని బాధితురాలు ఈ నెల 18న అత్తాపూర్ పోలీసులకు ఫిర్యాదు చేయడంతో కేసు నమోదు చేశారు. విచారణలో భాగంగా బుధవారం ఉదయం ఇన్‌స్పెక్టర్ సీతయ్య బృందం నిందితుడిని అశోక్‌నగర్‌లోని అతడి పూర్వ నివాసానికి తీసుకెళ్లి సీన్ రీ-కన్‌స్ట్రక్షన్ నిర్వహించింది.

దర్యాప్తు అనంతరం ఉదయ్ కృష్ణారెడ్డిని ఉప్పర్‌పల్లి కోర్టులో హాజరుపరచగా, న్యాయస్థానం అతనికి 14 రోజుల రిమాండ్ విధించింది. దీంతో పోలీసులు నిందితుడిని చంచల్‌గూడ జైలుకు తరలించారు. ఈ విషయాన్ని హైదరాబాద్ నగర పోలీస్ కమిషనర్ వీసీ సజ్జనార్ అధికారిక ప్రకటన ద్వారా వెల్లడించారు.

తనపై నమోదైన కేసును కొట్టివేయాలని కోరుతూ ఉదయ్ కృష్ణారెడ్డి తెలంగాణ హైకోర్టులో పిటిషన్ దాఖలు చేశారు. ఈ పిటిషన్‌పై విచారణ చేపట్టిన జస్టిస్ జె.శ్రీనివాసరావు.. రాష్ట్ర ప్రభుత్వంతో పాటు, ప్రైవేటు ప్రతివాది అయిన మహిళా ట్రైనీ ఐపీఎస్‌కు వ్యక్తిగత నోటీసులు జారీ చేశారు. పూర్తి వివరాలతో కౌంటర్ దాఖలు చేయాలని ఆదేశిస్తూ కేసు విచారణను ఆగస్టు 26వ తేదీకి వాయిదా వేశారు. లా అండ్ ఆర్డర్ కాపాడాల్సిన వ్యక్తే ఇలాంటి నేరారోపణల్లో అరెస్ట్ కావడం పోలీస్ వర్గాల్లో తీవ్ర చర్చనీయాంశంగా మారింది.