నిజాయితీకి మారుపేరైన కానిస్టేబుల్ త్రిమూర్తులు (వడ్డే నవీన్) లంచగొండితనానికి, అన్యాయానికి లొంగకపోవడం వల్ల తరచూ బదిలీలు (Transfers) ఎదుర్కొంటుంటాడు. ఈ క్రమంలోనే ఒక బదిలీపై తన తండ్రి గతంలో పనిచేసిన పాత పోలీస్ స్టేషన్‌కు వెళ్తాడు. అక్కడ అతనికి ఏళ్ల క్రితం జరిగిన ఒక గిరిజన యువతి ‘ప్రియమ్మ’ అత్యాచార కేసుకు సంబంధించిన పాత ఫైల్ దొరుకుతుంది. ఆ కేసును దర్యాప్తు చేసిన తన తండ్రి ఆశయం అసంపూర్తిగా మిగిలిపోయిందని తెలుసుకున్న త్రిమూర్తులు.. ఆ దారుణం వెనుక ఉన్న హోమ్ మంత్రి కమల కుమారుడు సంతోష్ బాబుపై ఎలా తిరుగుబాటు చేశాడు? రాజకీయ ఒత్తిళ్లను తట్టుకుని ప్రియమ్మ కుటుంబానికి ఎలా న్యాయం చేశాడు? అనేదే మిగిలిన కథ.

చాలా కాలం తర్వాత స్క్రీన్‌పై కనిపించినా వడ్డే నవీన్ తన బాడీ లాంగ్వేజ్, డైలాగ్ డెలివరీతో మెప్పించారు. ఒక సీరియస్ పోలీస్ పాత్రకు ఆయన పర్ఫెక్ట్‌గా సూట్ అయ్యారు. అయితే యాక్షన్ సీక్వెన్స్‌లు, డ్యాన్స్‌ల విషయంలో ఆయన కాస్త ఇబ్బంది పడినట్లు కనిపించింది. హీరో భార్యగా గృహిణి పాత్రలో రాశి సింగ్ డీసెంట్‌గా నటించగా, దేవీ ప్రసాద్, శిల్పా తులస్కర్ తమ పాత్రల పరిధి మేర రాణించారు. సాంకేతికంగా కళ్యాణ్ నాయక్ అందించిన సంగీతం, బ్యాక్‌గ్రౌండ్ స్కోర్ (BGM) సినిమా మూడ్‌ను బాగా ఎలివేట్ చేశాయి.