‘భారత్-యూకే స్వేచ్ఛా వాణిజ్య ఒప్పందం (FTA) కింద తిరుపతి నుంచి యూకేకు తొలిసారిగా జరిగిన మామిడి గుజ్జు ఎగుమతి మన రైతులకు అంతర్జాతీయ మార్కెట్ల తలుపులు తెరుస్తోంది. ఈ చారిత్రాత్మక ఒప్పందం ద్వారా సరికొత్త వ్యాపార అవకాశాలను సృష్టించిన ప్రధానమంత్రి నరేంద్ర మోదీ జీకి, కేంద్ర మంత్రి పీయూష్ గోయల్ జీకి నా హృదయపూర్వక అభినందనలు. ఆంధ్రప్రదేశ్‌లో ప్రపంచస్థాయితో పోటీపడే ఫుడ్ ప్రాసెసింగ్ పర్యావరణ వ్యవస్థను నిర్మించేందుకు మేం పూర్తిగా కట్టుబడి ఉన్నాం. దీనిద్వారా కేవలం ఉత్పత్తి పరిమాణమే కాకుండా దానికి అదనపు విలువను జోడించి మన రైతులు మరింత ఎక్కువ ఆదాయం గడించేలా చూస్తాం. మన ఆంధ్రా రుచులను ప్రపంచానికి పరిచయం చేసే దిశగా ఇదొక అద్భుతమైన ముందడుగు’ అని ఆయన ట్వీట్ చేశారు.

కాగా ఎఫ్టీఏ కుదరక ముందు ఉన్న అధికారిక గణాంకాలను పరిశీలిస్తే ఈ ఒప్పందం ప్రాధాన్యత ఇట్టే అర్థమవుతుంది. పీఐబీ నివేదిక ప్రకారం ప్రపంచవ్యాప్తంగా భారత్ 57 బిలియన్ డాలర్లకు పైగా వ్యవసాయ ఉత్పత్తులను ఎగుమతి చేస్తోంది. అటు బ్రిటన్ కూడా ఏటా 90 బిలియన్ డాలర్ల విలువైన వ్యవసాయ, ప్రాసెస్డ్ ఫుడ్ ఉత్పత్తులను ప్రపంచ దేశాల నుంచి దిగుమతి చేసుకుంటోంది. అయితే బ్రిటన్‌కు భారత్ చేస్తున్న ఎగుమతుల విలువ కేవలం 1.11 బిలియన్ డాలర్లు మాత్రమే ఉండటం గమనార్హం. బ్రిటన్ మార్కెట్లో భారతీయ తేయాకు, మామిడి, ద్రాక్ష, సుగంధ ద్రవ్యాలు, సముద్ర ఉత్పత్తులకు భారీ డిమాండ్ ఉంది. తాజా ఒప్పందంతో ఈ అపారమైన వాణిజ్య అవకాశాలను సులభంగా అందిపుచ్చుకునే మార్గం సుగమమైంది.

తిరుపతి నుంచి మొదలైన ఈ ఎగుమతులపై కేంద్ర మంత్రి పీయూష్ గోయల్ హర్షం వ్యక్తం చేశారు. రైతులకు ఇదొక పెద్ద మార్కెట్ అవకాశమని, తద్వారా వారు అత్యధిక లాభాలు పొందుతారని గోయల్ ఎక్స్ వేదికగా పేర్కొన్నారు. భారత్, బ్రిటన్ దేశాలు ఉమ్మడి ప్రజాస్వామ్య విలువల పునాదిగా వాణిజ్యం, పెట్టుబడులు, సాంకేతికత, రక్షణ రంగాల్లో బలమైన సహకారాన్ని పంచుకుంటున్నాయని ప్రధాని మోదీ స్పష్టం చేశారు. ఈ నెలలో సీఈటీఏ (సమగ్ర ఆర్థిక వాణిజ్య ఒప్పందం) అమలులోకి రావడంతో ద్వైపాక్షిక భాగస్వామ్యం మరింత బలోపేతం కానుందని ఆయన ధీమా వ్యక్తం చేశారు. లండన్‌లోని భారత హైకమిషన్ సైతం ఈ ఒప్పందం ప్రాథమిక విజయానికి ఈ ఎగుమతే అసలైన నిదర్శనమని సోషల్ మీడియాలో కొనియాడింది.