ఈ మ్యాచ్‌లో ‘ఇంపాక్ట్ ప్లేయర్’గా శార్దూల్ ఠాకూర్‌ను జట్టులోకి తీసుకున్నప్పటికీ, అతనికి ఒక్క ఓవర్ కూడా బౌలింగ్ ఇవ్వకపోవడం అందరినీ విస్తుపరిచింది. ఈ అంశంపై క్రిక్‌బజ్ షోలో విశ్లేషణ చేస్తూ మురళీ కార్తీక్ తన అసహనాన్ని వ్యక్తం చేశారు. “నాకైతే అస్సలు అర్థం కావడం లేదు. బహుశా అతన్ని ఒక ఆప్షన్‌గా తీసుకుని ఆ తర్వాత మర్చిపోయారేమో! నన్ను అడగకండి.. నా ముఖం చూస్తేనే తెలుస్తుంది నాకు ఏమీ అర్థం కావడం లేదని” అంటూ కార్తీక్ వ్యాఖ్యానించారు.

శార్దూల్ ఠాకూర్ వికెట్లు తీయగల బౌలర్ అని, గత మ్యాచ్‌ల్లోనూ మంచి ప్రదర్శన చేశాడని కార్తీక్ గుర్తు చేశారు. కానీ, బౌలర్లు భారీగా పరుగులు ఇస్తున్నప్పటికీ హార్దిక్ అతన్ని ఎందుకు వాడలేదు అనే ప్రశ్నకు సెహ్వాగ్ స్పందిస్తూ, “ఈ ప్రశ్నకు సమాధానం కేవలం హార్దిక్ పాండ్యా దగ్గర మాత్రమే ఉంది” అని ముగించారు.

ఈ ఓటమితో ముంబై ఇండియన్స్ పాయింట్ల పట్టికలో అట్టడుగు నుంచి రెండో స్థానానికి పడిపోయింది. ఇప్పటివరకు ఆడిన 8 మ్యాచ్‌ల్లో కేవలం రెండింటిలో మాత్రమే గెలిచిన ముంబైకి, ప్లేఆఫ్స్ చేరాలంటే ఇకపై జరిగే ప్రతి మ్యాచ్‌ గెలవడం అనివార్యంగా మారింది. బౌలింగ్ విభాగంలో ప్రధాన అస్త్రం జస్ప్రీత్ బుమ్రా కూడా ఈ మ్యాచ్‌లో 54 పరుగులు ఇచ్చి విఫలమవ్వడం జట్టు మేనేజ్‌మెంట్‌ను ఆందోళనకు గురిచేస్తోంది. ఈ నేపథ్యంలో హార్దిక్ పాండ్యా తన కెప్టెన్సీ వ్యూహాలను మార్చుకుంటాడో లేదో వేచి చూడాలి. ప్రస్తుతం సెహ్వాగ్, కార్తీక్ మధ్య జరిగిన ఈ ‘రెడ్ బుల్’ చర్చ సోషల్ మీడియాలో విపరీతంగా ట్రెండ్ అవుతోంది.