తమిళనాడు రాజకీయాల్లో ఒక చారిత్రాత్మక ఘట్టం ఆవిష్కృతమైంది. సుమారు 59 సంవత్సరాల సుదీర్ఘ విరామం తర్వాత కాంగ్రెస్ పార్టీ అక్కడ అధికారంలో భాగస్వామ్యం పంచుకోబోతోంది. నటుడు, రాజకీయ నాయకుడు జోసెఫ్ విజయ్ నేతృత్వంలోని తమిళగ వెట్రి కజగం (TVK) నూతన ప్రభుత్వంలో చేరడానికి కాంగ్రెస్ అధిష్ఠానం ఆమోదం తెలిపింది. ఈ మేరకు కాంగ్రెస్ పార్టీకి చెందిన ఇద్దరు ఎమ్మెల్యేలు అడ్వకేట్ రాజేశ్ కుమార్, పి. విశ్వనాథన్ విజయ్ క్యాబినెట్‌లో మంత్రులుగా బాధ్యతలు స్వీకరిస్తారని పార్టీ సీనియర్ నేత కేసీ వేణుగోపాల్ అధికారికంగా ప్రకటించారు. ఇటీవల జరిగిన శాసనసభ ఎన్నికల్లో టీవీకే (TVK) అతిపెద్ద పార్టీగా అవతరించినప్పటికీ, ప్రభుత్వ ఏర్పాటుకు అవసరమైన స్పష్టమైన మెజారిటీకి కొద్దిగా దూరంలో నిలిచింది. దీంతో ఐదుగురు ఎమ్మెల్యేలు ఉన్న కాంగ్రెస్ పార్టీ విజయ్‌కు పూర్తి మద్దతు ప్రకటించింది. 1967 తర్వాత కాంగ్రెస్ తమిళనాడు ప్రభుత్వంలో చేరడం ఇదే మొదటిసారి కావడం విశేషం.