ఈ వీడియోలో లారెన్స్ తన మనసులోని మాటను పంచుకున్నారు. “నేను ఫలితం ఆశించకుండా నిజాయతీగా పనిచేయాలనే సిద్ధాంతాన్ని బలంగా నమ్ముతాను. నా జీవితంలో రాజకీయాల్లోకి రావాలని నేను ఏనాడూ అనుకోలేదు. నాకు ఎలాంటి పదవులు, సీట్లు కావాలని లేదు, అలాగే రాజకీయం ద్వారా డబ్బు సంపాదించాలనే ఆలోచన అంతకంటే లేదు. నాకు అత్యంత సన్నిహితులెవరైనా రాజకీయాల్లోకి వస్తే, వారి పక్కన నిలబడి సమాజానికి ఇప్పుడు చేస్తున్న దానికంటే మరింత ఎక్కువ సేవ చేయాలని అనుకున్నాను. కానీ, ఇటీవల జరిగిన కొన్ని ఊహించని పరిస్థితులు, సంఘటనలు నన్ను రాజకీయాల్లోకి వచ్చేలా ప్రేరేపించాయి” అని ఆయన వివరించారు.

రాజకీయాల్లోకి వెళ్తాననే తన నిర్ణయానికి తన తల్లి కూడా అంగీకారం తెలిపారని లారెన్స్ పేర్కొన్నారు. అయితే, ప్రజాక్షేత్రంలోకి వెళ్లే ముందు ప్రజల అభిప్రాయమే సర్వోన్నతమని ఆయన స్పష్టం చేశారు. “నా నిర్ణయం సరైందో కాదో మీరే చెప్పాలి. సోషల్ మీడియా వేదికగా ప్రజలు, అభిమానులు ‘అవును’ (Yes) అని అంగీకరిస్తే.. మీ ఆశీస్సులతో రాజకీయ ప్రయాణం ప్రారంభిస్తాను. ఒకవేళ మీరు ‘వద్దు’ (No) అని చెబితే, ఈ ఆలోచనను ఇక్కడితోనే విరమించుకుంటాను. ఎప్పటిలాగే నా ట్రస్ట్ ద్వారా సమాజం కోసం నిస్వార్థంగా సేవలను కొనసాగిస్తాను” అని లారెన్స్ ప్రకటించారు.