2024 డిసెంబర్ 4న పుష్ప 2 బెనిఫిట్ షో సందర్భంగా సంధ్య థియేటర్ వద్ద తొక్కిసలాట జరిగిన సంగతి తెలిసిందే. ఈ తొక్కిసలాట లో రేవతి అనే మహిళ మృతి చెందగా, ఆమె కుమారుడు శ్రీతేజకు తీవ్రగాయాలు అయ్యాయి. ఆసుపత్రిలో చికిత్స పొందుతున్న శ్రీతేజ్ ఇప్పటికీ పూర్తిగా కోలుకోలేదు. ఈ ఘటనపై దర్యాప్తు చేపట్టి విచారణ కొనసాగిస్తున్నారు చిక్కడపల్లి పోలీసులు. ప్రాథమికంగా అనుమతులు లేవని హెచ్చరించినప్పటికీ శాంతిభద్రతల సమస్యలను లెక్కచేయకుండా అల్లు అర్జున్ సంధ్య థియేటర్‌కు రావడం, ఓపెన్ టాప్ జీపులో అభిమానులకు అభివాదం చేయడం వల్లనే రద్దీ పెరిగిందని, ఆ కారణంగానే తొక్కిసలాట జరిగిందని పోలీసుల ప్రాథమిక విచారణలో తేలింది. ఈ క్రమంలోనే అల్లు అర్జున్‌తో పాటు థియేటర్ యాజమాన్యం, బౌన్సర్లు సహా మొత్తం 23 మందిపై పోలీసులు ఛార్జ్ షీట్ దాఖలు చేశారు.