ఎయిర్ ఇండియా చరిత్రలోనే అత్యంత బ్లాక్ డేగా రోజుగా నిలిచే ఘోర ప్రమాదం జూన్ 2025లో చోటుచేసుకుంది. గుజరాత్‌లోని అహ్మదాబాద్ విమానాశ్రయం నుండి బయలుదేరిన కొద్దిసేపటికే ‘ఎయిర్ ఇండియా ఫ్లైట్ 171’గా పిలిచే బోయింగ్ 787 డ్రీమ్‌లైనర్ (Boeing 787 Dreamliner) విమానం సాంకేతిక లోపంతో కుప్పకూలిపోయింది. ఈ ఘోర విమానయాన విపత్తులో విమానంలో ప్రయాణిస్తున్న 240 మందికి పైగా ప్రయాణికులు, సిబ్బంది ప్రాణాలు కోల్పోయారు. ఇటీవలి కాలంలో భారత విమానయాన రంగంలో జరిగిన అత్యంత దారుణమైన ప్రమాదంగా ఇది నమోదైంది. ఈ ప్రమాదంపై స్పందించిన ఉన్నత స్థాయి దర్యాప్తు బృందాలు, విమానంలోని ఇంజిన్ ఫ్యూయల్-కంట్రోల్ స్విచ్ (ఇంధన నియంత్రణ వ్యవస్థ) పనితీరు, కాక్‌పిట్ డిజైన్‌ లోపాలే దీనికి ప్రధాన కారణమై ఉండవచ్చనే కోణంలో లోతైన విచారణను చేపట్టాయి.

ఇదే వరుసలో, ఫిబ్రవరి 2026లో ముంబైలోని ఛత్రపతి శివాజీ మహారాజ్ అంతర్జాతీయ విమానాశ్రయంలో మరో కార్యాచరణ లోపం తలెత్తింది. రన్‌వే పైకి వెళ్లడం కోసం విమానాశ్రయ ట్రాక్‌పై నెమ్మదిగా వెళ్తున్న (Taxiing) ఎయిర్ ఇండియా విమానం, అక్కడే ఉన్న దేశీయ విమానయాన సంస్థ ‘ఇండిగో’ (IndiGo) విమానాన్ని ప్రమాదకర రీతిలో ఢీకొట్టింది. ఈ రెండు విమానాల రెక్కల చివరలు (Wing-tips) ఒకదానికొకటి బలంగా తగలడంతో విమాన రెక్కల భాగాలు పాడయ్యాయి. పైలట్ల కమ్యూనికేషన్ లోపం లేదా గ్రౌండ్ స్టాఫ్ నిర్లక్ష్యం కారణంగానే ఈ ఘటన జరిగి ఉంటుందని అధికారులు ప్రాథమికంగా అంచనా వేశారు. విమానయాన నియంత్రణ సంస్థ ఈ ప్రమాదంపై పూర్తి స్థాయి విచారణకు ఆదేశించడంతో, దర్యాప్తు ముగిసే వరకు ఈ రెండు విమానాల ప్రయాణాలపై నిషేధం విధించి ఎయిర్‌పోర్టులోనే నిలిపివేశారు.

తాజాగా ఢిల్లీ నుండి బెంగళూరుకు ప్రయాణీకులతో బయలుదేరిన ఎయిర్ ఇండియా విమానం ‘AI2651’ బెంగళూరు అంతర్జాతీయ విమానాశ్రయంలో ల్యాండింగ్ అయ్యే సమయంలో ప్రమాదానికి గురైంది. రన్‌వే పైకి దిగుతున్న తరుణంలో నియంత్రణ కోల్పోవడంతో విమానం వెనుక భాగం రన్‌వేను బలంగా ఢీకొట్టింది. విమానయాన రంగంలో దీనిని ‘టెయిల్ స్ట్రైక్’ (Tail Strike) అని పిలుస్తారు. ఈ ప్రమాదం జరిగిన సమయంలో విమానంలో ఉన్న ప్రయాణికులందరూ ఎలాంటి గాయాలు కాకుండా సురక్షితంగా బయటపడినప్పటికీ, విమానం వెనుక భాగం తీవ్రంగా దెబ్బతినడంతో తదుపరి సాంకేతిక తనిఖీల కోసం ఆ విమాన సర్వీసులను తాత్కాలికంగా  నిలిపివేశారు.