తిరుమలకు భక్తులు పోటెత్తారు. సమ్మర్ హాలిడేస్, పోటీ పరీక్షలు పూర్తి కావడంతో రెండు తెలుగు రాష్ట్రాల నుండే కాకుండా దేశ వ్యాప్తంగా ఉన్న శ్రీవారి భక్తులు ముక్కులు తీర్చుకునేందుకు, దర్శనం చేసుకునేందుకు తండోపతండాలుగా తిరుమలకు చేరుకున్నారు. దీంతో వైకుంఠ క్యూ కాంప్లెక్స్ లోని క్యూలైన్లు, రోడ్లు పూర్తిగా భక్తులతో నిండిపోయాయి. రద్దీ అనూహ్యంగా పెరగడంతో శ్రీవారి సర్వదర్శనానికి ఏకంగా 30 గంటల సమయం పడుతుందని తిరుమల తిరుపతి దేవస్థానం (టీటీడీ) అధికారులు ప్రకటించారు. తిరుమలలో పెరిగిన భక్తుల రద్దీని దృష్టిలో పెట్టుకొని ఈరోజు నుండి ఎలాంటి సిఫార్సు లేఖలు తీసుకోమని టీటీడీ ప్రకటించింది. దీంతో సామాన్య భక్తులతో వస్తున్న వాహనాలు అలిపిరి టోల్ ప్లాజా నుంచి గరుడ సర్కిల్ వరకు వాహనాల రద్దీ కూడా పెరుగోతోంది.

బుధవారం మధ్యాహ్నం భక్తుల రద్దీ ఒక్కసారిగా పెరగడంతో టీటీడీ అధికారులు మధ్యాహ్నం 1 గంట నుంచి రాత్రి 8 గంటల వరకు సర్వదర్శనం క్యూలైన్‌ను తాత్కాలికంగా నిలిపివేశారు. తిరిగి రాత్రి 8 గంటలకు భక్తులను క్యూలైన్లలోకి అనుమతించారు. ఈరోజు ఉదయం నాటికి వైకుంఠం క్యూ కాంప్లెక్స్‌లోని అన్ని కంపార్ట్‌మెంట్లు నిండిపోయి, క్యూలైన్లు ఆక్టోపస్ భవనం వరకు బారులు తీరాయి.

ప్రస్తుతం సర్వదర్శనం టోకెన్లు లేని భక్తులకు దర్శనానికి 30 గంటలు, టోకెన్లు ఉన్నవారికి 6 నుంచి 7 గంటల సమయం పడుతుందని టీటీడీ తెలిపింది. రూ.300 ప్రత్యేక ప్రవేశ దర్శనానికి 4 నుంచి 5 గంటల సమయం పడుతోంది. బుధవారం ఒక్కరోజే 86,315 మంది భక్తులు స్వామివారిని దర్శించుకోగా, 44,107 మంది తలనీలాలు సమర్పించారు. హుండీ ఆదాయం రూ.3.94 కోట్లుగా నమోదైంది. భక్తుల రద్దీ దృష్ట్యా టీటీడీ విస్తృత ఏర్పాట్లు చేస్తోంది. క్యూలైన్లలోని భక్తులకు అన్నపానీయాలు అందిస్తూ, ఎండల తీవ్రత దృష్ట్యా జాగ్రత్తలు తీసుకుంటోంది.