ఈ మే నెలలోనే గత కొన్ని రోజులుగా డిమాండ్ తీవ్రంగా పెరుగుతోంది. ఈ నెల 19న 4,748 మెగావాట్ల విద్యుత్ డిమాండ్ నమోదు కాగా.. 20వ తేదీన నగరంలో కొద్దిగా మబ్బులు పట్టడంతో డిమాండ్ 4,653 మెగావాట్లకు తగ్గింది. అయితే, 21వ తేదీన భానుడు మళ్లీ ప్రతాపం చూపించడంతో డిమాండ్ ఒక్కసారిగా పెరిగి 4,750 మెగావాట్ల మార్కును దాటింది. రాబోయే రోజుల్లో ఎండలు ఇలాగే కొనసాగితే నగరంలో విద్యుత్ డిమాండ్ 5,000 మెగావాట్లను చేరడం ఖాయమని ఎస్పీడీసీఎల్ (TSSPDCL) అధికారులు అంచనా వేస్తున్నారు.

ఇందులో భాగంగా కందుకూరులో కొత్తగా నిర్మించిన 132/33కేవీ ఉపకేంద్రంలో రెండు కొత్త 33కేవీ ఫీడర్లను అధికారులు చార్జ్ చేశారు. ఎస్పీడీసీఎల్ రంగారెడ్డి జోన్ సీజీఎం పాండ్యానాయక్ సమక్షంలో ఈ ఫీడర్ల చార్జింగ్ ప్రక్రియ విజయవంతంగా ప్రారంభమైంది. దీనివల్ల ఫ్యాబ్‌సిటీ ఈహెచ్‌టీ ఉపకేంద్రంపై లోడ్ గణనీయంగా తగ్గింది. ఈ కొత్త ఫీడర్ల ఏర్పాటుతో కందుకూరు, జైత్వారం, పులిమామిడి, నేదనూరు, కొత్తగూడ గ్రామాలు మరియు వాటి పరిసర ప్రాంతాల వినియోగదారులకు ఎటువంటి అంతరాయాలు లేకుండా లో-వోల్టేజ్ సమస్యలు రాకుండా మెరుగైన విద్యుత్ సరఫరా అందుతుందని ఇంజినీర్లు స్పష్టం చేశారు.

పరిస్థితి ఎంత ఒత్తిడితో కూడుకున్నదైనా నగరవాసులకు నిరంతరాయ విద్యుత్ అందించేందుకు సిబ్బంది రాత్రింబవళ్లు శ్రమిస్తున్నారని, ప్రజలు కూడా ఏసీలను తగిన ఉష్ణోగ్రత (24°C నుండి 26°C) వద్ద ఉంచి విద్యుత్‌ను పొదుపుగా వాడుకోవాలని అధికారులు కోరుతున్నారు.