“నిన్న వెలువడిన ట్రిబ్యునల్ తీర్పు నాకు ఎంతో ఆనందాన్నిచ్చింది. నిజం ఎప్పటికైనా గెలుస్తుందని ఈ రోజు నిరూపితమైంది,” అని మోదీ హర్షం వ్యక్తం చేశారు. తాను ఎల్లప్పుడూ ఐపీఎల్ శ్రేయస్సు కోసమే పనిచేశానని, క్రికెట్ అభివృద్ధి మినహా తనకు వేరే స్వార్థం లేదని ఆయన కుండబద్దలు కొట్టారు. ఆ పీడకల లాంటి అధ్యాయం ముగిసిపోయిందని, ఇక తన జీవితంలో ఉత్సాహంగా ముందుకు సాగాలని నిర్ణయించుకున్నట్లు ఆయన వెల్లడించారు. తన కుటుంబ సభ్యులతో సమయం గడపడానికే ప్రాధాన్యత ఇస్తానని తెలిపారు.

ఊరట స్మగ్లర్స్ అండ్ ఫారిన్ ఎక్స్ఛేంజ్ మానిప్యులేటర్స్ చట్టం (SAFEMA) కింద ఉన్న అప్పీలేట్ ట్రిబ్యునల్ లలిత్ మోదీకి కీలక ఉపశమనం కలిగించింది. 2009లో దక్షిణాఫ్రికా వేదికగా జరిగిన ఐపీఎల్ నిర్వహణకు సంబంధించి ఈడీ నమోదు చేసిన కేసుకు సరైన ఆధారాలు లేవని ట్రిబ్యునల్ స్పష్టం చేసింది. ఈడీ చేసిన ఆరోపణలను, విధించిన పెనాల్టీలను చాలా వరకు రద్దు చేసింది. దీంతో ఆయనపై ఉన్న అతిపెద్ద న్యాయపరమైన కేసుల్లో ఒకటి పూర్తిస్థాయిలో ఆయనకు అనుకూలంగా ముగిసినట్లు అయింది.

ప్రపంచంలోనే అత్యంత ఆదరణ పొందిన క్రికెట్ లీగ్ ఐపీఎల్‌ను ప్రారంభించిన ఘనత పూర్తిగా లలిత్ మోదీకే దక్కుతుంది. తొలి చైర్మన్‌గా ఈ టోర్నీని విశ్వవ్యాప్తం చేయడంలో ఆయన కీలక పాత్ర పోషించారు. అయితే ఆయన ప్రయాణం ఎన్నో వివాదాలకు కేంద్ర బిందువుగా మారింది. అవినీతి, నిధుల దుర్వినియోగం, ప్రసార హక్కుల కేటాయింపుల్లో అక్రమాలు జరిగాయన్న తీవ్ర ఆరోపణలతో బీసీసీఐ (BCCI) ఆయనపై 2013లో జీవితకాల నిషేధం విధించింది. ఏ క్రికెట్ పాలక మండలిలోనూ ఆయన పదవులు చేపట్టకుండా బీసీసీఐ శాశ్వతంగా బహిష్కరించింది.