ఘటన అనంతరం ఇండిగో సాంకేతిక నిపుణుల బృందం రాజ్‌కోట్ విమానాశ్రయానికి చేరుకుని విమానాన్ని క్షుణ్ణంగా పరిశీలిస్తోంది. కార్గో హోల్డ్‌లో పొగ ఎందుకు కనిపించిందనే అంశంపై దర్యాప్తు కొనసాగుతోంది. సాంకేతిక లోపమా లేదా మరే ఇతర కారణమా అన్నది పరిశీలన అనంతరం వెల్లడయ్యే అవకాశం ఉందని అధికారులు తెలిపారు.

రాజ్‌కోట్ ఎయిర్‌పోర్ట్ పోలీస్ స్టేషన్ ఇన్‌స్పెక్టర్ కేపీ తరేటియా మాట్లాడుతూ, విమానంలో పొగ ఉన్నట్లు అనుమానించిన పైలట్ భద్రతను దృష్టిలో ఉంచుకుని అత్యవసర ల్యాండింగ్‌కు నిర్ణయం తీసుకున్నారని చెప్పారు. అన్ని భద్రతా నిబంధనలను పాటిస్తూ విమానాన్ని సురక్షితంగా దింపినట్లు వెల్లడించారు.

ఇదిలా ఉండగా, ఇదే ఏడాది మే నెలలో కూడా ఇండిగోకు చెందిన మరో విమానంలో ఇలాంటి అత్యవసర పరిస్థితి ఏర్పడింది. హైదరాబాద్ నుంచి చండీగఢ్‌కు వెళ్లిన విమానం గమ్యస్థానానికి చేరుకుని పార్కింగ్ బే వైపు వెళ్తుండగా, ఓ ప్రయాణికుడి పవర్ బ్యాంక్‌లో మంటలు చెలరేగి క్యాబిన్‌లో పొగ వ్యాపించింది. అప్పట్లో విమాన సిబ్బంది వెంటనే మంటలను అదుపులోకి తెచ్చినా, జాగ్రత్త చర్యగా ప్రయాణికులను ఎమర్జెన్సీ స్లైడ్ల ద్వారా బయటకు తరలించారు. ఆ ఘటనలో ఒక ప్రయాణికుడికి స్వల్ప గాయాలు కాగా, మిగిలిన వారంతా క్షేమంగా బయటపడ్డారు.

తాజా ఘటనలో కూడా ముందస్తు భద్రతా చర్యల కారణంగా ఎలాంటి ప్రాణనష్టం లేదా గాయాలు జరగకపోవడంతో అధికారులు ఊపిరిపీల్చుకున్నారు. ప్రస్తుతం విమాన పరిశీలన పూర్తయ్యాకే పొగకు అసలు కారణంపై స్పష్టత వచ్చే అవకాశం ఉంది.