తిరుమల తిరుపతి దేవస్థానం (టీటీడీ) విడుదల చేసిన తాజా గణాంకాల ప్రకారం.. 2026 జులై నెలలో శ్రీవారి హుండీకి ఏకంగా రూ.140.28 కోట్ల భారీ ఆదాయం సమకూరింది. తిరుమల చరిత్రలో ఒకే నెలలో ఇంత భారీ స్థాయిలో వసూళ్లు రావడం ఇది రెండోసారి మాత్రమే కావడం గమనార్హం. ఇప్పటివరకు తిరుమల చరిత్రలో అత్యధిక నెలవారీ ఆదాయం 2022 ఆగస్టులో నమోదైంది. ఆ నెలలో భక్తులు రికార్డు స్థాయిలో రూ.140.34 కోట్లు కానుకలుగా సమర్పించారు. ఇప్పుడు ఆ పాత రికార్డుకు అత్యంత చేరువగా 2026 జులై వసూళ్లు నిలవడం విశేషం. కేవలం కొద్ది లక్షల రూపాయల తేడాతో ఆల్ టైమ్ రికార్డు తృటిలో తప్పిపోయింది.

ఏటేటా పెరుగుతున్న భక్తుల రద్దీ, స్వామివారిపై వారికి ఉన్న అపార భక్తిప్రపత్తులకు ఈ కానుకలే ప్రత్యక్ష నిదర్శనం. భక్తులు సమర్పించే ఈ హుండీ ఆదాయాన్ని టీటీడీ అనేక ధార్మిక, సామాజిక కార్యక్రమాలకు వినియోగిస్తోంది. నిత్యాన్నదానం, విద్యాసంస్థల నిర్వహణ, ఆసుపత్రుల ద్వారా ఉచిత వైద్య సేవలు తదితర ప్రజాపయోగ కార్యక్రమాలకు ఈ నిధులను ఖర్చు చేస్తోంది. గోవింద నామస్మరణతో నిత్యం మారుమోగే తిరుమలగిరులపై వడ్డికాసులవాడి వైభవం దినదినాభివృద్ధి చెందుతోందనడానికి ఈ హుండీ రికార్డులే సజీవ సాక్ష్యాలుగా నిలుస్తున్నాయి.