గత ఏడాది సెప్టెంబర్ నెలలో కరూర్ పట్టణంలో జరిగిన ఘోర తొక్కిసలాటలో 41 మంది ప్రాణాలు కోల్పోయిన ఘటన దేశవ్యాప్తంగా తీవ్ర విషాదాన్ని నింపింది. ఈ దుర్ఘటనలో తమ ఆత్మీయులను కోల్పోయిన బాధిత కుటుంబాలకు అండగా నిలవాలని తమిళనాడు ప్రభుత్వం నిర్ణయించింది. ఇందులో భాగంగా మృతుల కుటుంబాల్లో ఒకరికి కారుణ్య నియామకం కింద ప్రభుత్వ ఉద్యోగం ఇస్తామని ప్రకటించింది. అయితే ఈ ప్రభుత్వ ఉత్తర్వులను మద్రాస్ హైకోర్టు కొట్టివేసింది. దీనిపై తమిళనాడు ప్రభుత్వం సుప్రీంకోర్టును ఆశ్రయించింది. ఈ పిటిషన్‌ను విచారించిన జస్టిస్ జేబీ పార్దీవాలా, జస్టిస్ కే వినోద్ చంద్రన్‌లతో కూడిన సుప్రీంకోర్టు ద్విసభ్య ధర్మాసనం శుక్రవారం కీలక ఆదేశాలు జారీ చేసింది.