ఈనాడు కథనం ప్రకారం.. బెళగావి జిల్లాకు చెందిన సందీప్ కలగౌడ మంజరగి (46) ఒక మాజీ సైనికుడు. అతని భార్య సుమ. అయితే, సుమకు పుండలీక డౌంబర్ అనే వ్యక్తితో వివాహేతర సంబంధం ఏర్పడింది. ఈ క్రమంలోనే భర్త సందీప్ పేరు మీద రూ. 2 కోట్ల భారీ బీమా (ఇన్సూరెన్స్) పాలసీ ఉన్నట్లు సుమకు, ఆమె ప్రియుడికి తెలిసింది. ఎలాగైనా సందీప్‌ను అడ్డుతొలగించుకుంటే.. ఒకరికొకరం తోడుగా ఉండటమే కాకుండా, రూ. 2 కోట్ల భారీ సొమ్ముతో విలాసవంతమైన జీవితాన్ని గడపవచ్చని వీరిద్దరూ పథకం వేశారు.

పథకం ప్రకారం.. మార్చి 13న సందీప్ ఒక రోడ్డు ప్రమాదంలో గాయపడ్డారు. దీంతో వెంటనే ఆయనను హుక్కేరిలోని ఒక ప్రైవేట్ ఆసుపత్రిలో చేర్పించారు. నిజానికి ఆ ప్రమాదంలో ఆయనకు పెద్దగా ప్రాణాపాయం కలగలేదు. కానీ, ఇదే సమయం కోసం ఎదురుచూస్తున్న భార్య సుమ, ఆమె ప్రియుడు పుండలీక ఘోరానికి ఒడిగట్టారు. మార్చి 15న ఆసుపత్రిలో సందీప్ బెడ్‌పై ఉన్న సమయంలో, ఎవరికీ అనుమానం రాకుండా ఆయనకు ఎక్కిస్తున్న సెలైన్ బాటిల్‌లో అత్యంత ఘోరమైన విషాన్ని కలిపారు. విషం శరీరంలోకి పాకడంతో సందీప్ మంజరగి ఆసుపత్రిలోనే ప్రాణాలు విడిచారు.

రోడ్డు ప్రమాదంలో తగిలిన గాయాల వల్లే చికిత్స పొందుతూ సందీప్ మరణించాడని భార్య సుమ నాటకమాడింది. బంధువులను, గ్రామస్తులను నమ్మించి హడావుడిగా అంత్యక్రియలు కూడా పూర్తి చేసేశారు. ఆ తర్వాత బీమా సొమ్ము క్లెయిమ్ చేసుకోవడం కోసం నకిలీ వైద్య పరీక్షల నివేదికలను సృష్టించడం ప్రారంభించారు. ఇందుకోసం బెళగావి కమిషనర్ కార్యాలయం ఎఫ్‌డీఏ అశోక గుజనాళ, ఫోరెన్సిక్ ప్రయోగశాల గుమస్తా అప్పాసాహెబ నాయక, ల్యాబ్ అసిస్టెంట్ అడవి స్వామిమఠ, సీనియర్ సైంటిఫిక్ ఆఫీసర్ పీఎన్ నాగరాజ్, మరియు ఒక ఆర్‌ఎంపీ వైద్యుడు బసవరాజ భస్మెలకు భారీగా లంచాలు ఇచ్చి తమ నేరం బయటపడకుండా మేనేజ్ చేశారు.

సందీప్ మరణం వెనుక ఏదో కుట్ర దాగి ఉందనే అనుమానంతో అతని సోదరుడు స్థానిక యమకనమరడి పోలీస్ స్టేషన్‌లో ఫిర్యాదు చేశారు. రంగంలోకి దిగిన పోలీసులు ప్రత్యేక బృందంగా ఏర్పడి దర్యాప్తు ప్రారంభించారు. మొదట భార్య సుమను, ఆమె ప్రియుడు పుండలీకను అదుపులోకి తీసుకుని తమదైన శైలిలో విచారించగా అసలు నిజం ఒప్పుకున్నారు. సెలైన్‌లో విషం కలిపి చంపిన వైనాన్ని వివరిస్తూ, తమకు సహకరించిన మిగతా నిందితుల పేర్లను వెల్లడించారు.