2002 మాంచెస్టర్ కామన్వెల్త్ గేమ్స్ నుంచి వరుసగా ప్రతీసారి పతకాల పట్టికలో అగ్ర ఐదు స్థానాల్లో నిలుస్తూ వస్తున్న భారత్‌కు ఈసారి ఆ ఘనతను కాపాడుకోవడం కష్టంగా మారేలా ఉంది. బర్మింగ్‌హామ్‌లో భారత్ గెలుచుకున్న 61 పతకాల్లో సగానికి పైగా హాకీ, కుస్తీ, బ్యాడ్మింటన్, టేబుల్ టెన్నిస్, షూటింగ్ నుంచే వచ్చాయి. ఇప్పుడు ఈ ఐదు క్రీడలూ టోర్నీలో లేకపోవడంతో భారత ఆశలన్నీ అథ్లెటిక్స్, బాక్సింగ్, వేట్‌లిఫ్టింగ్‌లపైనే నిలిచాయి.

భారత్ ఈసారి అథ్లెటిక్స్‌లో 32 మంది సభ్యులతో కూడిన పెద్ద బృందాన్ని బరిలోకి దింపుతోంది. రెండుసార్లు ఒలింపిక్ పతక విజేత అయిన స్టార్ జావెలెన్ త్రోయర్ నీరజ్ చోప్రా ఈ బృందానికి నాయకత్వం వహిస్తున్నారు. ఆయనతో పాటు హైజంప్‌లో సర్వేష్ కుషారే, లాంగ్‌జంప్‌లో మురళీ శ్రీశంకర్, ట్రిపుల్ జంప్‌లో ప్రవీణ్ చిత్రవేల్, పురుషుల, మహిళల 4×400 మీటర్ల రిలే జట్లు కూడా పతక రేసులో ఉన్నాయి. బర్మింగ్‌హామ్‌లో భారత్ అథ్లెటిక్స్ నుంచి 8 పతకాలు సాధించింది.

వేట్‌లిఫ్టింగ్‌లో అందరి దృష్టి ఒలింపిక్స్ రజత పతక విజేత మీరాబాయి చాను (31)పైనే ఉంది. గత రెండు కామన్వెల్త్ గేమ్స్‌లో స్వర్ణాలు సాధించిన చాను, ఈసారి హ్యాట్రిక్ కొట్టాలని పట్టుదలతో ఉన్నారు. అయితే జాతీయ క్యాంప్‌లో పలువురు క్రీడాకారులు డోపింగ్ పరీక్షల్లో విఫలం కావడంతో, ఈసారి భారత్ నుంచి కేవలం 11 మంది వేట్‌లిఫ్టర్లు మాత్రమే పాల్గొంటున్నారు.

బాక్సింగ్‌లో టోక్యో ఒలింపిక్ కాంస్య పతక విజేత లోవ్లీనా బోర్గోహైన్ (75 కేజీలు) కామన్వెల్త్ క్రీడల్లో తొలి పతకాన్ని వేటాడుతున్నారు. ప్రపంచ ఛాంపియన్ జైస్మీన్ లంబోరియా (57 కేజీలు) గతంలో సాధించిన కాంస్యాన్ని స్వర్ణంగా మార్చాలని ఉవ్విళ్లూరుతున్నారు. ఆసియా ఛాంపియన్లు ప్రీతి పవార్ (54 కేజీలు), సాక్షి చౌదరి (51 కేజీలు), అరుంధతి చౌదరి (70 కేజీలు)తో పాటు పురుషుల విభాగంలో నరేందర్ బెర్వాల్ (+90 కేజీలు), సచిన్ సివాచ్ (60 కేజీలు) పతక రేసులో ముందంజలో ఉన్నారు. వీరితో పాటు జూడో, లాన్ బాల్స్, పారా-అథ్లెటిక్స్ విభాగాల్లోనూ భారత క్రీడాకారులు మెరుగైన ప్రదర్శన చేసి పతకాల సంఖ్యను పెంచాలని లక్ష్యంగా పెట్టుకున్నారు. ఈసారి ఆరు క్రీడల్లో పారా ఈవెంట్లను కూడా కలిపి నిర్వహిస్తున్నారు.