సమావేశం ముగిసిన అనంతరం పార్టీ నిర్ణయాలను ఏఐసీసీ ప్రధాన కార్యదర్శి కేసీ వేణుగోపాల్ మీడియాకు వెల్లడించారు. ప్రస్తుతం దేశంలో అత్యంత ప్రమాదకరమైన పరిస్థితులు నెలకొన్నాయని ఆయన ఆందోళన వ్యక్తం చేశారు. ఒకవైపు ప్రజాస్వామ్య విలువలు పతనమవుతుంటే.. మరోవైపు సామాన్య ప్రజలు తమ జీవనోపాధి కోసం, నిత్య జీవిత అవసరాల కోసం తీవ్రంగా పోరాడాల్సి వస్తోందని అన్నారు.

ఈ అత్యవసర సమావేశంలో లోక్‌సభ ప్రతిపక్ష నేత రాహుల్ గాంధీ మాట్లాడుతూ.. సైద్ధాంతికంగా బలమైన పునాదులు కలిగి, ఎక్కడా విచ్ఛిన్నం కాని ఏకైక పార్టీ కాంగ్రెస్ మాత్రమేనని ఉద్ఘాటించారు. దేశాన్ని విభజించేలా వ్యవహరిస్తున్న బీజేపీ, ఆర్‌ఎస్‌ఎస్ (RSS) ల వైఖరిపై నిరంతరాయంగా పోరాటం చేయడానికి సరైన వేదిక తమ పార్టీయేనని ఆయన నొక్కిచెప్పారు.

కేంద్ర హోంమంత్రి అమిత్ షా లక్ష్యంగా కాంగ్రెస్ సీనియర్ నేత జైరాం రమేశ్ తీవ్ర విమర్శలు గుప్పించారు. లోక్‌సభలో నియోజకవర్గాల పునర్విభజన (డిలిమిటేషన్) బిల్లును ఆమోదింపజేసుకోవడానికి కేంద్ర హోంమంత్రి అమిత్ షా ఎన్ని తంటాలు పడినా, దానికి అవసరమైన మూడింట రెండొంతుల (2/3) మెజారిటీని బీజేపీ ఎప్పటికీ సాధించలేదని ఆయన ఎద్దేవా చేశారు. దేశంలోని డబుల్ ఇంజిన్ ప్రభుత్వాలు ఓట్ల చోరీతో పాటు, సీట్ల చోరీకి అలవాటు పడ్డాయని దుయ్యబట్టారు. మొత్తానికి, రాబోయే రోజుల్లో ప్రజా సమస్యలను అజెండాగా చేసుకుని దేశవ్యాప్తంగా పెద్ద ఎత్తున ఆందోళనలకు కాంగ్రెస్ సిద్ధమవడంతో, దేశ రాజకీయం మరోసారి వేడెక్కనుంది.