న్యూస్18 ఇంగ్లీష్ కథనం ప్రకారం.. జ్యోతిష్యుడు బెల్లూరు ద్వారకానాథ్ పాత జ్ఞాపకాలను నెమరువేసుకుంటూ.. డీకే శివకుమార్ సుమారు 40 సంవత్సరాల క్రితం మొదటిసారి తన వద్దకు వచ్చారని గుర్తుచేసుకున్నారు. ఆ సమయంలోనే ఆయన జాతకాన్ని పరిశీలించి, భవిష్యత్తులో ఒకరోజు ఆయన కచ్చితంగా ఈ రాష్ట్రానికి నాయకత్వం వహిస్తారని తాను జోస్యం చెప్పానన్నారు. “చాలా సంవత్సరాల క్రితం డీకే శివకుమార్ నా వద్దకు వచ్చినప్పుడు, ఆయన జాతకంలో గ్రహాల స్థితి చాలా బలంగా ఉండటాన్ని నేను గమనించాను. ఆయన ఒకరోజు కర్ణాటకను పాలిస్తారని అప్పుడే చెప్పాను. నిజానికి ఈ పరిణామం కనీసం ఏడాది క్రితమే జరగాల్సింది, కానీ కొన్నిసార్లు విధి లిఖితం ప్రకారం సమయం ఆలస్యమవుతుంది. ఇప్పుడు దానికి తగిన సమయం ఆసన్నమైందనిపిస్తోంది” అని ద్వారకానాథ్ పేర్కొన్నారు.
శివకుమార్ తనకు అత్యంత ఆప్తుడని, తామిద్దరం నిరంతరం సంప్రదింపుల్లో ఉంటామని ఆయన తెలిపారు. “నాతో మాట్లాడకుండా ఆయన సాధారణంగా ఎక్కడికీ వెళ్లరు. మేము వారానికి చాలాసార్లు మాట్లాడుకుంటాము. నేను ఆయనను నా సొంత కొడుకులా చూసుకుంటాను. బయట జనాలు ఆయనను చాలా కఠినమైనవాడిగా లేదా అహంకారిగా చూడవచ్చు, కానీ ఆయన చాలా దయా హృదయుడు” అని జ్యోతిష్యుడు వివరించారు.
ఈ సందర్భంగా ద్వారకానాథ్ తన గత అనుభవాలను కూడా పంచుకున్నారు. దేశంలో ఎమర్జెన్సీ (అత్యవసర స్థితి) ముగిసిన తర్వాత మాజీ ప్రధాని ఇందిరా గాంధీకి కూడా తాను కీలక సలహాలు ఇచ్చానని చెప్పారు. ఆమెను కర్ణాటకలోని పలు ప్రసిద్ధ ఆలయాలకు తీసుకువెళ్లి దర్శనాలు చేయించిన తర్వాత, ఆమె తిరిగి దేశ అధికార పీఠాన్ని అధిరోహిస్తారని తాను అప్పుడే అంచనా వేశానని, అది కూడా నిజమైందని ఆయన ఈ సందర్భంగా గుర్తుచేశారు.
కర్ణాటక నాయకత్వ మార్పుపై తీవ్రస్థాయిలో ఊహాగానాలు నడుస్తున్న తరుణంలో ఈ జ్యోతిష్యుడి వ్యాఖ్యలు రాజకీయ వర్గాల్లో పెద్ద చర్చకు దారితీశాయి. కనకపుర అసెంబ్లీ నియోజకవర్గానికి ప్రాతినిధ్యం వహిస్తున్న డీకే శివకుమార్, కాంగ్రెస్ శాసనసభా పక్ష (CLP) నేతగా ఎన్నికవుతారని భారీగా అంచనాలు ఉన్నాయి.
మరోవైపు, ప్రముఖ జ్యోతిష్యుడు ద్వారకానాథ్ గురూజీ పిటిఐ (PTI) వార్తా సంస్థతో మాట్లాడుతూ.. డీకే శివకుమార్ ముఖ్యమంత్రిగా ప్రమాణ స్వీకారం చేయడానికి తాను మూడు అనుకూలమైన తేదీలను సూచించినట్లు వెల్లడించారు. మే 31 (ఆదివారం), జూన్ 5, జూన్ 6 తేదీలను ముహూర్తాలుగా నిర్ణయించి ఆయనకు ఇచ్చినట్లు పేర్కొన్నారు.
శివకుమార్ జాతకం ప్రకారం ఆయన ముఖ్యమంత్రిగా సుదీర్ఘ కాలం పాటు పదవిలో కొనసాగుతారని, 2028 అసెంబ్లీ ఎన్నికల తర్వాత కూడా ఆయనే మళ్లీ అధికారంలోకి వస్తారని ద్వారకానాథ్ జోస్యం చెప్పారు. “ఆయన కేవలం ఒక్క రోజుకో లేదా ఒక విడతకో పరిమితమయ్యే ముఖ్యమంత్రి కాదు. ఆయన జాతకం అత్యంత శక్తివంతమైనది. ఆయన కర్ణాటక రాష్ట్రానికి సుదీర్ఘకాలం పాటు సేవలు అందిస్తారు. కాంగ్రెస్ అధిష్ఠానం మద్దతు కూడా ఆయనకు పూర్తిగా ఉంటుంది” అని ధీమా వ్యక్తం చేశారు. శివకుమార్ నాయకత్వంపై నమ్మకాన్ని ప్రకటిస్తూ, ఆయనకున్న అద్భుతమైన విజన్ కారణంగా ఆయన పరిపాలనలో కర్ణాటక రాష్ట్రం ఎంతో ఆరోగ్యకరంగా, సంపన్నంగా మారుతుందని జ్యోతిష్యుడు ఆకాంక్షించారు.
2028 అసెంబ్లీ ఎన్నికల గురించి మాట్లాడుతూ.. శివకుమార్ ప్రజల నుంచి మళ్లీ కొత్త తీర్పును కోరేముందు, ప్రస్తుతం తనపై ఉన్న బాధ్యతలను సమర్థవంతంగా పూర్తి చేయాల్సి ఉంటుందని ద్వారకానాథ్ అభిప్రాయపడ్డారు. “నిస్సందేహంగా ఆయన తదుపరి ఎన్నికల్లో విజయం సాధించాలి. అప్పుడే ఆయన నిజమైన అర్థంలో ప్రజా ముఖ్యమంత్రి అవుతారు. ప్రస్తుతానికి ఆయన నిర్వర్తించాల్సిన బాధ్యతలు చాలా ఉన్నాయి. ఆ పనుల యొక్క ఫలితాలను అనుభవించడానికి తదుపరి విడత కాలం ఉపయోగపడుతుంది” అని వివరించారు.
ప్రస్తుత రాజకీయ పరిణామాలను గమనిస్తే, శనివారం సాయంత్రం 4 గంటలకు బెంగళూరులోని విధానసౌధలో కాంగ్రెస్ శాసనసభా పక్షం (CLP) సమావేశమై తమ కొత్త నాయకుడిని అధికారికంగా ఎన్నుకోనుంది. ఇప్పటికే ముఖ్యమంత్రి సిద్ధరామయ్య సమర్పించిన రాజీనామాను గవర్నర్ థావర్చంద్ గెహ్లాట్ ఆమోదించడంతో పాటు రాష్ట్ర మంత్రివర్గాన్ని రద్దు చేశారు. దీనితో కర్ణాటకలో సరికొత్త ప్రభుత్వం ఏర్పాటవడానికి, డీకే శివకుమార్ ముఖ్యమంత్రి పీఠాన్ని అధిరోహించడానికి మార్గం పూర్తిగా సుగమమైంది. భౌతికంగా రాజకీయ వ్యూహాలు ఎలా ఉన్నప్పటికీ, తెర వెనుక జ్యోతిష్య గణాంకాలు కూడా డీకే శివకుమార్కు అనుకూలంగా ఉండటం విశేషం.
