జులై 4 నుండి కనిపించకుండా పోయిన 11-12 ఏళ్ల బాలిక మృతదేహం ఒక రోజు తర్వాత సూర్యపూర్ హాట్ ప్రాంతంలో గోనె సంచిలో కుక్కబడి లభ్యమైంది. ఈ ఘోరకలి స్థానికంగా తీవ్ర ఆగ్రహాన్ని రేకెత్తించింది. నిందితులను వెంటనే అరెస్ట్ చేయాలంటూ స్థానికులు బారుయిపూర్-జోయ్‌నగర్ రహదారిని దిగ్బంధించి, టైర్లను తగులబెట్టారు. ఆగ్రహించిన నిరసనకారులు పోలీస్ వాహనాలను కూడా ధ్వంసం చేశారు. ఈ క్రమంలోనే బాలిక మరణంతో సంబంధం ఉందనే అనుమానంతో ఒక వ్యక్తిని కోపోద్రిక్తులైన గుంపు కొట్టి చంపింది (లిన్చింగ్).

బాలిక ప్రాథమిక పోస్ట్‌మార్టం నివేదిక అత్యంత ఘోరమైన నిజాలను బయటపెట్టింది. బాలికపై లైంగిక దాడి జరిగిందని, ఆమె ప్రైవేట్ భాగాలపై తీవ్ర గాయాల గుర్తులు, శరీరంపై గోళ్ళ గీతలు, కాటు గుర్తులు ఉన్నట్లు సీనియర్ పోలీస్ అధికారి తెలిపారు. అంతేకాకుండా, బాలిక తలపై ఏదో బరువైన వస్తువుతో బలంగా బాదడం లేదా గట్టి ఉపరితలానికి కొట్టడం జరిగిందని తేలింది. బాలిక ఊపిరితిత్తులు, కడుపులో నీరు చేరి ఉండటాన్ని బట్టి.. తలకు తీవ్ర గాయమై రక్తం కారుతున్న స్థితిలోనే ఆమెను నీటిలో పడేసారని, ఆ రకంగా రక్తస్రావం, నీటిలో మునగడం వల్లే ఆమె ప్రాణాలు పోయాయని వైద్యులు నిర్ధారించారు.

పశ్చిమ బెంగాల్ ముఖ్యమంత్రి సువేందు అధికారి మంగళవారం బాధితురాలి కుటుంబాన్ని పరామర్శించారు. ఈ కేసుపై 72 గంటల్లోగా నివేదిక సమర్పించాలని తాము డీజీపీ సిద్ధ నాథ్ గుప్తాను ఆదేశించినట్లు చెప్పారు. అలాగే, నిరసనల సమయంలో గుంపు దాడిలో మరణించిన యువకుడు ఇంద్రజిత్ మోండల్ పూర్తిగా అమాయకుడని సీఎం స్పష్టం చేశారు.