2022లో ఖతార్ వేదికగా జరిగిన ఫిఫా వరల్డ్ కప్ మ్యాచ్‌ల సమయాలు భారత వీక్షకులకు ఎంతో అనుకూలంగా ఉండటంతో ‘వయాకామ్18’ (Viacom18) భారీ ధరకు హక్కులను కొనుగోలు చేసింది. కానీ, ఈసారి మ్యాచ్‌లు ఉత్తర అమెరికా టైమ్ జోన్ల ప్రకారం జరుగుతుండటంతో భారత కాలమానానికి, అక్కడి కాలమానానికి చాలా వ్యత్యాసం ఉంది. అర్ధరాత్రి, తెల్లవారుజామున మ్యాచ్‌లు ఉండటం వల్ల వ్యూవర్‌షిప్ తగ్గుతుందనే ఆందోళనతో భారతదేశంలోని పలు అగ్రశ్రేణి బ్రాడ్‌కాస్టర్లు ఈసారి వేలంలో పాల్గొనడానికి వెనుకడగు వేశాయి. వారాల తరబడి సాగిన చర్చల అనంతరం ‘జీ’ సంస్థ రంగంలోకి దిగి ఈ హక్కులను దక్కించుకుంది.

ఈ ఒప్పందం కేవలం 2026 ప్రపంచకప్‌కే పరిమితం కాలేదు. అంతర్జాతీయ ఫుట్‌బాల్ సమైక్య (FIFA)తో జీ గ్రూప్ ఏకంగా ఎనిమిదేళ్ల (8 Years) సుదీర్ఘ భాగస్వామ్య ఒప్పందాన్ని కుదుర్చుకుంది. దీని ప్రకారం 2034 వరకు జరిగే పలు కీలక అంతర్జాతీయ టోర్నీల హక్కులు జీ వశమయ్యాయి.

ఈ టోర్నీని లైవ్‌లో చూడాలనుకునే భారత ఫుట్‌బాల్ ప్రియులు రాత్రిళ్లు నిద్రలు మానుకోవడానికి సిద్ధం కావాల్సిందే. అట్లాంటా, డల్లాస్, హ్యూస్టన్ వంటి నగరాల్లో జరిగే మ్యాచ్‌లు భారత కాలమానం ప్రకారం (IST) సాధారణంగా రాత్రి 9:30 నుండి రాత్రి 10:30 గంటల మధ్య ప్రారంభమవుతాయి. పసిఫిక్ తీర నగరాలైన వాంకోవర్, శాన్ ఫ్రాన్సిస్కోలలో జరిగే మ్యాచ్‌లు కాస్త ఆలస్యంగా.. అంటే భారత కాలమానం ప్రకారం ఉదయం 9:30 గంటలకు కూడా ప్రారంభమయ్యే అవకాశం ఉంది.