ఈనాడు కథనం ప్రకారం, హైదరాబాద్ నగరంలో శనివారం మధ్యాహ్నం సరిగ్గా 12:12 గంటలకు ఈ వింత చోటుచేసుకోనుంది. ఈ సమయంలో సూర్యుడు సరిగ్గా మన నడినెత్తి మీదుకు వస్తాడు. ఫలితంగా నిలువుగా ఉన్న ఏ వస్తువు నీడ అయినా సరే, బయటకు కనిపించకుండా నేరుగా ఆ వస్తువు కిందకే చేరిపోతుంది. దీంతో కొద్ది నిమిషాల పాటు నీడ మాయమైనట్లు మనకు అనిపిస్తుంది.

దీని వెనుక ఉన్న శాస్త్రీయ కారణాలను ప్లానెటరీ సొసైటీ ఆఫ్ ఇండియా డైరెక్టర్ ఎన్. శ్రీరఘునందన్ కుమార్ వివరించారు. భూమి తన చుట్టూ తాను తిరుగుతూ సూర్యుడి చుట్టూ పరిభ్రమించే క్రమంలో సూర్య కిరణాలు ఎప్పుడూ ఒకేలా పడవు. భూమధ్య రేఖకు ఉత్తర, దక్షిణ దిశల్లో ఉన్న కర్కట రేఖ (Tropic of Cancer) నుంచి మకర రేఖ (Tropic of Capricorn) మధ్య ప్రాంతాల్లో మాత్రమే సూర్య కిరణాలు నిలువుగా పడే అవకాశం ఉంటుంది.

ఈ వింతను చూడాలనుకునే వారు మధ్యాహ్నం 12:12 గంటల సమయంలో బయట ఎండలో ఒక నిలువుగా ఉండే కర్రను లేదా ఏదైనా స్థూపాకార వస్తువును నేలపై ఉంచితే, దాని నీడ మాయమవ్వడాన్ని స్పష్టంగా గమనించవచ్చు. కేవలం వస్తువులే కాకుండా మనం ఎండలో నిలబడినా మన నీడ మన పాదాల కిందకే చేరిపోవడాన్ని చూడవచ్చు.