ప్రతి మ్యాచ్‌కు దాదాపు 1000 నుంచి 1200 ఉచిత పాస్‌లను ఈ ముఠా బ్లాక్‌లో అక్రమంగా విక్రయించినట్లు తెలుస్తోంది. పక్కా ప్రణాళికతో సాగుతున్న ఈ దందాలో పెట్రోల్ బంక్ ఉద్యోగి పంకజ్ యాదవ్ పాత్ర కూడా బయటపడటంతో అతడిని విచారించారు. అనంతరం ఈ వ్యవహారంపై డీడీసీఏ అధికారులను పిలిపించి సుమారు నాలుగు గంటల పాటు పోలీసులు సుదీర్ఘంగా ప్రశ్నించారు.

అభిమానుల డిమాండ్, ఆడే జట్లు, స్టార్ ఆటగాళ్లను బట్టి వీరు టికెట్ల ధరలను నిర్ణయించారు. ఒక్కో కాంప్లిమెంటరీ టికెట్‌ను కనిష్టంగా రూ. 8,000 నుంచి గరిష్టంగా రూ. 80,000 వరకు బ్లాక్‌లో అమ్మినట్లు పోలీసుల దర్యాప్తులో తేలింది. రాయల్ ఛాలెంజర్స్ బెంగళూరు మ్యాచ్‌లో విరాట్ కోహ్లీ ఆటను చూసేందుకు క్రేజ్ ఎక్కువగా ఉండటంతో ఆ మ్యాచ్ టికెట్లను ఏకంగా రూ. 80,000కు పైగా విక్రయించి కాసులు దండుకున్నారు.

నిబంధనల ప్రకారం, స్టేడియం సామర్థ్యంలో పది నుంచి పదిహేను శాతం కాంప్లిమెంటరీ పాస్‌లను ఆతిథ్య క్రికెట్ సంఘానికి ఫ్రాంచైజీలు తప్పనిసరిగా ఇవ్వాల్సి ఉంటుంది. ఈ లెక్కన డీడీసీఏకు ప్రతి మ్యాచ్‌కు సుమారు 6,000 ఉచిత పాస్‌లు వచ్చాయి. అందులో 4,000 పాస్‌లను తమ సభ్యులకు పంపిణీ చేశారు.

మిగిలిన పాస్‌లను బ్లాక్‌లో అమ్మేందుకు సదరు డీడీసీఏ ఉన్నతాధికారి పెట్రోల్ బంక్ ఉద్యోగికి రహస్యంగా అప్పగించినట్లు ఓ జాతీయ మీడియా సంస్థ తన నివేదికలో వెల్లడించింది. ఈ కుంభకోణంలో ఇంకెవరి హస్తం ఉందనే కోణంలో పోలీసులు లోతుగా దర్యాప్తు చేస్తున్నారు.