రాష్ట్రంలో భూమి చట్టాలు, భూకేటాయింపుల విషయంలో అధికార కాంగ్రెస్ ప్రతిపక్ష బీఆర్ఎస్ మధ్య గట్టి వార్ జరుగుతోంది. ఈవిషయంలో బుధవారం అసెంబ్లీలో 22ఏ పై జరిగిన చర్చలో కేసీఆర్ ఆయన కుటుంబ సభ్యులకు వందల ఎకరాల భూములు ఎలా వచ్చాయని..? ప్రభుత్వ రికార్డులను తారుమారు చేసి తప్పుడు పత్రాలు సృష్టించుకున్నారని అందుకోసమే ధరణిని వాడుకున్నారని రేవంత్ రెడ్డి చేసిన కామెంట్స్‌కి బీఆర్ఎస్ వర్కింగ్ ప్రెసిడెంట్ కేటీఆర్ ధీటుగా బదులిచ్చారు. గురువారం మీడియాతో మాట్లాడిన కేటీఆర్ తన తండ్రి భూస్వామి అని ఆయనకు వందల ఎకరాలు ఉండకూడదా అని ప్రశ్నించారు. తాను అమెరికాలో చదువుకొని, ఉద్యోగం చేసిన డబ్బుతో భూములు కొనుక్కుంటే రేవంత్ రెడ్డి అవన్నీ అక్రమంగా రాయించుకున్న భూములని చెప్పడంపై సెటైర్ వేశారు. గోడలపై రాతలు రాసుకున్న నీకు జూబ్లిహిల్స్ లో ప్యాలెస్, నీ తమ్ముళ్లకు ఏరో స్పెస్ కంపెనీలు ఎలా వచ్చాయో చెప్పగలవా అంటూ ప్రశ్నించారు. నువ్వు అధికారంలోకి వచ్చిన తర్వాత మీ బాబాయి ఎందుకు చనిపోయాడో చెప్పాలని కేటీఆర్ రేవంత్ రెడ్డిని ప్రశ్నించారు.

కేసీఆర్ ఫామ్ హౌస్ లెక్కలు తేలుస్తానంటూ విచారణకు ఆదేశించిన రేవంత్ రెడ్డికి కేటీఆర్ మరికొన్ని విమర్శలు చేశారు. తన తండ్రి ఎన్నికల అఫిడవిట్‌లో తన ఆస్తి, భూముల వివరాలను పొందుపర్చారని చెప్పారు. వాటిని ఒకసారి చూసుకొని మాట్లాడాలని హెచ్చరించారు. కేవలం డిగ్రీ మాత్రమే చదివిన రేవంత్ రెడ్డికి ఇన్నీ వేల ఎకరాల భూమి, ఆస్తులు, కుటుంబ సభ్యుల పేరుతో కంపెనీలు ఎలా వచ్చాయో చెప్పగలరా అంటూ ప్రతిదాడికి దిగారు కేటీఆర్. తమ పార్టీ నేతలపై ఇష్టం వచ్చినట్లుగా ఆరోపణలు చేస్తే ఎవరూ చూస్తూ ఊరుకోరని హెచ్చరించారు. ఇక సీఎం ఇల్లు కూడా నిషేధిత జాబితాలో ఎందుకు పెట్టకూడదని కేటీఆర్ ప్రశ్నించారు. అలాంటప్పుడు సీఎంకు ప్రత్యేకమైన చట్టాలు ఉన్నాయా.. సామాన్యులకు ప్రత్యేక చట్టం ఉంటుందా అని నిలదీశారు బీఆర్ఎస్ వర్కింగ్ ప్రెసిడెంట్.

బుధవారం రేవంత్ రెడ్డి 22A పై చర్చ అంటూ బీఆర్ఎస్ నేతలపై చేసిన భూ ఆరోపణలు చేసి విషయాన్ని తప్పుదారి పట్టించారని అన్నారు. నిజంగా కాంగ్రెస్ ప్రభుత్వానికి దమ్ముంటే భూ వివాదంపై సమగ్ర చర్చ జరపడానికి నెల రోజులు అసెంబ్లీని నిర్వహించాలన్నారు. తమపై ఉన్న సస్పెన్షన్‌ని ఎత్తివేస్తే బీఆర్ఎస్ సభ్యులంతా సమావేశాలకు హాజరవుతామని.. రేవంత్ రెడ్డి ఆరోపణలు, విమర్శలకు తగిన కౌంటర్ ఇస్తామని కేటీఆర్ బదులిచ్చారు.