పోలీసులు తెలిపిన వివరాల ప్రకారం.. ముంబైలోని అంధేరి – బోరీవలీ స్టేషన్ల మధ్య మంగళవారం రాత్రి ఈ దారుణ సంఘటన జరిగింది. ఆ సమయంలో బయట భారీ వర్షం కురుస్తోంది. రైలు ప్రయాణిస్తున్న క్రమంలో.. లోపలికి వర్షం పడకుండా ఉండేందుకు రైలు తలుపులు మూయాలని ఒకరు, లేదు తెరిచి ఉంచాలని మరొకరు వాగ్వాదానికి దిగారు. ఈ క్రమంలో ప్రయాణికుడైన సచిన్ రమేశ్ సువర్ణ (30), మయాంక్ లోహర్ (22) అనే యువకుడి మధ్య మాట మాట పెరిగి గొడవ పెద్దదైంది.

రైలులో ఉన్న ప్రయాణికులను కత్తితో బెదిరిస్తూ వీరంగం సృష్టించిన నిందితుడు సచిన్ రమేశ్, రైలు బోరీవలీ స్టేషన్‌కు చేరుకుంటుండగా వేగాన్ని అందుకుని కిందికి దూకి చాకచక్యంగా పరారయ్యాడు. తీవ్రంగా గాయపడిన మయాంక్‌ను తోటి ప్రయాణికులు, రైల్వే సిబ్బంది కలిసి వెంటనే చికిత్స నిమిత్తం సమీపంలోని ఆసుపత్రికి తరలించారు. అయితే, అప్పటికే అతడు మృతి చెందినట్లు వైద్యులు పరీక్షించి ధ్రువీకరించారు.

రైల్వే పరిధిలో జరిగిన ఈ ఘోర హత్యను ముంబై పోలీసులు అత్యంత ప్రతిష్టాత్మకంగా తీసుకున్నారు. నిందితుడిని పట్టుకునేందుకు ప్రత్యేక బృందాలను రంగంలోకి దించారు. బోరీవలీ స్టేషన్‌తో పాటు రైల్వే పరిసర ప్రాంతాల్లో ఉన్న సుమారు 400 సీసీటీవీ (CCTV) కెమెరాల ఫుటేజీలను పోలీసులు కూలంకషంగా పరిశీలించారు. సీసీటీవీ విజువల్స్ ఆధారంగా నిందితుడు సచిన్ రమేశ్ సువర్ణను గుర్తించి, కొన్ని గంటల వ్యవధిలోనే పోలీసులు అతనిని అరెస్టు చేశారు. స్వల్ప కారణానికే తోటి ప్రయాణికుడిని ఇంత ఘోరంగా హతమార్చడంపై ప్రయాణికులు దిగ్భ్రాంతి వ్యక్తం చేస్తున్నారు. పోలీసులు కేసు నమోదు చేసి దర్యాప్తు జరుపుతున్నారు.