ఈనాడు కథనం ప్రకారం… సిద్దిపేట పట్టణంలోని మంగళపల్లి ప్రాంతానికి చెందిన గండూరి సంతోష్ (22) చార్టర్డ్ ఎకౌంటెంట్ (CA) చదివి, వృత్తిపరంగా రాణిస్తున్నాడు. విద్యావంతుడైన సంతోష్ తన ప్రతిభతో 2024లో ‘పిఎస్సి నెట్‌వర్క్ ప్రైవేట్ లిమిటెడ్’ (PSC Network Pvt Ltd) అనే స్టార్టప్ కంపెనీని స్థాపించి దానికి సీఈఓగా వ్యవహరిస్తున్నాడు. ఎంతో ప్రకాశవంతమైన భవిష్యత్తు ఉన్న సంతోష్, కొన్ని నెలల క్రితం మెల్లగా ఆన్‌లైన్ గేమిం, గ్యాంబ్లింగ్‌కు అలవాటు పడ్డాడు. ప్రారంభంలో సరదాగా మొదలైన ఈ అలవాటు, ఆ తర్వాత తీవ్రమైన వ్యసనంగా మారింది. గేమ్‌లలో గెలవాలనే తాపత్రయంతో వరుసగా డబ్బులు పందెం కాస్తూ, భారీ మొత్తంలో నష్టపోతూ వచ్చాడు.

హైదరాబాద్‌లోని హబ్సిగూడలో నివాసముంటున్న సంతోష్, ఆన్‌లైన్ గ్యాంబ్లింగ్ వల్ల ఎదురైన నష్టాలను పూడ్చుకోవడానికి విపరీతంగా అప్పులు చేశాడు. చివరకు ఆ అప్పులు తీర్చలేక హైదరాబాద్‌లో ఉన్న తన సొంత ఇంటిని సైతం విక్రయించాల్సి వచ్చింది. అయినప్పటికీ అప్పుల భారం తీరకపోవడం, గేమింగ్ వ్యసనం నుంచి బయటపడలేకపోవడంతో తీవ్ర మనస్తాపానికి గురయ్యాడు.

అయితే ఆ తర్వాత సంతోష్ ఫోన్ స్విచ్ఛాఫ్ రావడంతో కంగారుపడిన కుటుంబ సభ్యులు, బంధువులు అతని కోసం గాలింపు చేపట్టారు. మంగళవారం రాత్రి వేళ సిద్దిపేట గుడి వెనుక ఉన్న నిర్జన ప్రాంతంలో సంతోష్ మృతదేహం పడి ఉండటాన్ని స్థానికులు, కుటుంబ సభ్యులు గమనించారు.