ప్రపంచ దేశాలతో పోటీ పడుతూ భారత యువత గ్లోబల్ వృద్ధికి కూడా తోడ్పడుతోందని ప్రధాని మోదీ తెలిపారు. “ప్రపంచంలోని ప్రధాన ఆర్థిక వ్యవస్థలలో భారతదేశం ప్రస్తుతం అత్యంత వేగంగా అభివృద్ధి చెందుతోంది. దీనికి కారణం ఎవరు? భారతీయ యువత శక్తి, నైపుణ్యం, సామర్థ్యాలే” అని ఆయన స్పష్టం చేశారు.

విద్యా వ్యవస్థలో తీసుకువస్తున్న సంస్కరణల గురించి కూడా ప్రధాని మోదీ ప్రస్తావించారు. దేశవ్యాప్తంగా 14,000 కు పైగా ‘పీఎం శ్రీ’ (PM SHRI) పాఠశాలలను అభివృద్ధి చేశామని, వీటి ద్వారా పిల్లల్లో సృజనాత్మకత, శాస్త్రీయ దృక్పథాన్ని పెంపొందించడమే లక్ష్యమని ఆయన వివరించారు. దీనికి తోడు 10,000 కు పైగా అటల్ టింకరింగ్ ల్యాబ్‌లను ఏర్పాటు చేశామని, దేశంలో మెడికల్ కాలేజీల సంఖ్య 823కి పెరిగిందని తెలిపారు.

మైసూర్ నగరం భారతదేశ శాశ్వత సాంస్కృతిక చైతన్యానికి కేంద్రమని మోదీ అభివర్ణించారు. ఇక్కడి దేవాలయాలు, సంప్రదాయాలు, పండుగలు, మైసూర్ ప్యాలెస్, మైసూర్ దసరా వంటివి దేశ వారసత్వాన్ని ప్రతిబింబిస్తాయని అన్నారు. రామకృష్ణ ఆశ్రమం, స్వామి వివేకానంద జ్ఞాపకాలు మైసూర్ గుర్తింపులో విడదీయరాని భాగమని ఆయన పేర్కొన్నారు. అంతకుముందు ప్రధాని మోదీకి హెలిప్యాడ్ వద్ద కర్ణాటక ముఖ్యమంత్రి డీకే శివకుమార్, గవర్నర్ థావర్‌చంద్ గెహ్లాట్ ఘనస్వాగతం పలికారు. వివేక స్మారకలో ప్రధాని కొద్దిసేపు ధ్యానం చేసి, వివేకానందుడికి సంబంధించిన అరుదైన ఫోటోలు, చారిత్రక పత్రాలను పరిశీలించారు.