భారతదేశ ఆర్థిక, సాంకేతిక వృద్ధిపై ప్రపంచ దేశాలు ఎంతో ఆసక్తి చూపిస్తున్నాయని ప్రధానమంత్రి నరేంద్ర మోదీ తెలిపారు. శనివారం దేశవ్యాప్తంగా నిర్వహించిన రోజ్‌గార్ మేళా కార్యక్రమంలో ఆయన వర్చువల్‌గా పాల్గొని, సుమారు 51వేల మంది యువతకు ప్రభుత్వ ఉద్యోగ నియామక పత్రాలు అందజేశారు. ఈ సందర్భంగా ప్రధాని మోదీ మాట్లాడుతూ, ఇటీవల తాము పూర్తి చేసుకున్న ఐదు దేశాల విదేశీ పర్యటన అనుభవాలను పంచుకున్నారు. ప్రపంచవ్యాప్తంగా ఉన్న ప్రముఖ కంపెనీల అధినేతలతో జరిపిన చర్చల్లో భారతదేశ యువత ప్రతిభ, సాంకేతిక పురోగతిపై అంతర్జాతీయంగా ఎంతో ఉత్సాహం కనిపించిందని ప్రధాని పేర్కొన్నారు. ప్రస్తుత తరుణంలో ప్రపంచ దేశాలన్నీ భారత వృద్ధి ప్రయాణంలో భాగస్వాములు కావాలని బలంగా కోరుకుంటున్నాయని ఆయన స్పష్టం చేశారు.