ఈ ఘటనపై ఒడిశా ముఖ్యమంత్రి కార్యాలయం స్పందిస్తూ, ఇద్దరు వ్యక్తులు మరణించిన విషయాన్ని ధృవీకరించింది. అయితే ఇది శాంతిభద్రతల లోపం లేదా క్రౌడ్ మేనేజ్‌మెంట్ వైఫల్యం వల్ల జరిగిన తొక్కిసలాట కాదని స్పష్టం చేసింది. రథయాత్ర సందర్భంగా బడదండ వద్ద జరిగిన ఈ ఘటనలో ప్రాణాలు కోల్పోయిన భక్తుల కుటుంబాలకు ముఖ్యమంత్రి తన తీవ్ర సంతాపం ప్రకటించారు.

అంతకుముందు గురువారం మధ్యాహ్నం భక్తుల జయజయధ్వనాలు, భక్తిశ్రద్ధల మధ్య ముగ్గురు దేవతామూర్తుల రథాల లాగడం ప్రారంభమైంది. బలభద్రుడి ‘తాళధ్వజం’, జగన్నాథుడి ‘నందిఘోష’, సుభద్ర దేవి ‘దర్పదలన’ రథాలు ముందుకు సాగాయి. స్వామివార్లను దర్శించుకునేందుకు లక్షలాది మంది భక్తులు పోటీ పడ్డారు. పూరీ రాజు దివ్యసింఘ దేవ్ సాంప్రదాయబద్ధంగా రథాలపై క్రతువును నిర్వహించారు. పూరీ శంకరాచార్య జగద్గురు నిశ్చలానంద సరస్వతి కూడా రథాలపై ఉన్న దేవతామూర్తులకు ప్రత్యేక పూజలు చేశారు.