తమపై విధించిన నిషేధానికి వ్యతిరేకంగా టెలిగ్రామ్ దాఖలు చేసిన పిటిషన్‌ను కేంద్రం వ్యతిరేకించింది. ఆ సోషల్ మీడియా ప్లాట్‌ఫామ్‌కు వ్యతిరేకంగా తన దగ్గర తగినంత సాక్ష్యాధారాలు ఉన్నాయని కేంద్రం కోర్టుకు తెలిపింది.

టెలిగ్రామ్ తరఫున హాజరైన లాయర్.. ప్రభుత్వ చర్య వల్ల 15 కోట్ల మందికి పైగా వినియోగదారులు ప్రభావితమయ్యారని కోర్టుకు తెలిపారు. ఈ బ్లాకింగ్ ఉత్తర్వు ఏకపక్షంగా తీసుకున్నారనీ, దీనికి తగిన కారణాలు లేవని ఆ ప్లాట్‌ఫామ్ తరపున వాదించారు. “దేశంలో 15 కోట్ల మంది వినియోగదారులు ఉన్నారు. మీరు ప్రతీదాన్నీ బ్లాక్ చేస్తారు. ఆర్టికల్ 14ను పూర్తిగా ఉల్లంఘించారు” అని న్యాయవాది అన్నారు.

కేంద్రం తరఫున వాదిస్తున్న సొలిసిటర్ జనరల్ తుషార్ మెహతా, నిషేధానికి వ్యతిరేకంగా టెలిగ్రామ్ దాఖలు చేసిన పిటిషన్‌ను వ్యతిరేకించారు. ఆ సోషల్ మీడియా ప్లాట్‌ఫామ్‌కు వ్యతిరేకంగా తగినంత సాక్ష్యాధారాలు ఉన్నాయని ఆయన కోర్టుకు తెలిపారు. “మేము మే నెల నుంచే వారితో మాట్లాడుతున్నాము. మేము వెంటనే ఏమీ చెప్పలేము” అని కేంద్రం కోర్టుకు తెలిపింది. ఈ ప్లాట్‌ఫామ్‌కు సంబంధించిన ఆందోళనలు చాలా వారాలుగా పరిశీలనలో ఉన్నాయని కేంద్రం వాదన సూచిస్తోంది.

మొత్తంగా వెంటనే రిలీఫ్ లభించలేదు. గురువారం కేంద్రం చెప్పే వాదన, దానికి టెలిగ్రామ్ తరపు లాయర్ చెప్పే వాదనలను బట్టీ.. ఢిల్లీ హైకోర్టు తగిన నిర్ణయం తీసుకునే ఛాన్స్ ఉంది.

నీట్-యూజీ 2026 పునఃపరీక్షకు కేవలం కొన్ని రోజుల ముందు ఈ కేసు, ఈ బ్యాన్ దేశవ్యాప్త చర్చగా మారింది. కొంతమంది ఇలాంటి చర్యలు తప్పవు అంటుంటే.. మరికొందరు.. దీని వల్ల టెలిగ్రామ్‌లో స్టడీ మెటీరియల్ చదివే వారికి ఇబ్బంది అవుతుంది అంటున్నారు. గురువారం కేంద్రం ఏం చెబుతుంది అనేది ఇప్పుడు హాట్ టాపిక్‌గా ఉంది.