వైకుంఠం క్యూ కాంప్లెక్స్‌లోకి ఓ భక్తుడు మొబైల్ ఫోన్‌తో ప్రవేశించి అక్కడి కంపార్టుమెంట్లలో వీడియోలు చిత్రీకరించినట్లు సమాచారం. అంతేకాకుండా ఆ వీడియోలను సోషల్ మీడియాలో, ముఖ్యంగా ఇన్‌స్టాగ్రామ్‌లో పోస్టు చేయడంతో ఈ విషయం బయటపడింది. ప్రస్తుతం ఆ వీడియోలు సోషల్ మీడియాలో చక్కర్లు కొడుతుండటంతో తిరుమల భద్రతా వ్యవస్థపై చర్చ మొదలైంది.

సాధారణంగా వైకుంఠం క్యూ కాంప్లెక్స్‌లోకి ప్రవేశించే ప్రతి భక్తుడిని ప్రత్యేక తనిఖీల అనంతరం మాత్రమే లోపలికి అనుమతిస్తారు. ఎంట్రీ పాయింట్ల వద్ద మొబైల్ ఫోన్లు, ఎలక్ట్రానిక్ పరికరాలను స్వాధీనం చేసుకుని ప్రత్యేక లాకర్లలో భద్రపరిచే విధానం అమల్లో ఉంది. ఇలాంటి పరిస్థితుల్లో ఒక భక్తుడు మొబైల్‌తో లోపలికి ఎలా ప్రవేశించగలిగాడనే ప్రశ్నలు తలెత్తుతున్నాయి.

పవిత్రమైన శ్రీవారి దర్శనానికి సంబంధించిన ప్రాంతాల్లో వీడియోలు తీయడం నిబంధనలకు విరుద్ధమని భక్తులు అభిప్రాయపడుతున్నారు. కట్టుదిట్టమైన భద్రతా ఏర్పాట్లు ఉన్నాయని భావిస్తున్న సమయంలో ఇలాంటి ఘటన జరగడం ఆందోళన కలిగిస్తోందని పలువురు పేర్కొంటున్నారు. సోషల్ మీడియా కోసం నిబంధనలను ఉల్లంఘించడం సరైంది కాదని, దీనిపై టీటీడీ కఠిన చర్యలు తీసుకోవాలని డిమాండ్ చేస్తున్నారు.

ఈ ఘటనతో టీటీడీ భద్రతా వ్యవస్థ మరింత అప్రమత్తం కావాల్సిన అవసరం ఉందనే అభిప్రాయాలు వ్యక్తమవుతున్నాయి. భవిష్యత్తులో ఇలాంటి ఘటనలు పునరావృతం కాకుండా తనిఖీ వ్యవస్థను మరింత పటిష్టం చేయాలని, నిబంధనలు ఉల్లంఘించే వారిపై కఠిన చర్యలు తీసుకోవాలని భక్తులు కోరుతున్నారు. ప్రస్తుతం ఈ ఘటన తిరుమల భక్తుల్లో చర్చనీయాంశంగా మారింది.