గత కొంతకాలంగా తిరుపతి పరిసర ప్రాంతాలతో పాటు పొరుగు జిల్లాల్లో వరుస ద్విచక్ర వాహనాల చోరీలకు పాల్పడుతూ పోలీసులకు సవాలుగా మారిన అంతర్ జిల్లా దొంగల ముఠా ఆటను తిరుపతి జిల్లా పోలీసులు కట్టడి చేశారు. ఆరుగురు సభ్యుల ముఠాను అరెస్ట్ చేసి, వారి వద్ద నుంచి సుమారు రూ.20 లక్షల విలువైన 18 ద్విచక్ర వాహనాలు, చోరీలకు ఉపయోగించిన ఒక ఆటోను స్వాధీనం చేసుకున్నారు. జిల్లా పోలీస్ కార్యాలయం (డీపీవో)లో శుక్రవారం ఏర్పాటు చేసిన విలేకరుల సమావేశంలో తిరుపతి ఎస్పీ సుబ్బరాయుడు ఈ కేసుకు సంబంధించిన సమగ్ర వివరాలను మీడియాకు వెల్లడించారు.