పర్యావరణ పరిరక్షణ, పచ్చదనం పెంపొందించడం, వాతావరణ కాలుష్యాన్ని తగ్గించడం, భవిష్యత్ తరాలకు ఆరోగ్యకరమైన, పరిశుభ్రమైన వాతావరణాన్ని అందించాలనే లక్ష్యంతో ఈ కార్యక్రమాన్ని నిర్వహించారు. ప్రకృతి సమతుల్యతను కాపాడడంలో చెట్ల పాత్ర ఎంతో కీలకమని తెలియజేస్తూ, ప్రతి ఒక్కరూ తమ జీవితంలో కనీసం ఒక మొక్కను నాటి దానిని సంరక్షించాలనే సందేశాన్ని ఈ సందర్భంగా అందించారు.

ఈ సందర్భంగా తిరుమల డీఎస్పీ శ్రీ విజయ శేఖర్ మాట్లాడుతూ, మొక్కలు మనిషి మనుగడకు ఆధారమని, అవి ప్రాణవాయువును అందించడంతో పాటు కార్బన్ డయాక్సైడ్‌ను గ్రహించి వాతావరణ కాలుష్యాన్ని తగ్గించడంలో కీలక పాత్ర పోషిస్తాయని తెలిపారు. పెరుగుతున్న పర్యావరణ సమస్యలను అధిగమించాలంటే ప్రతి పౌరుడు చెట్ల సంరక్షణను తన బాధ్యతగా భావించాలని సూచించారు. అలాగే జిల్లా ఎస్పీ శ్రీ ఎల్. సుబ్బరాయుడు, ఐపీఎస్., మాట్లాడుతూ పర్యావరణ పరిరక్షణ ప్రతి ఒక్కరి సామాజిక బాధ్యత అని, పోలీసు శాఖ కేవలం శాంతి భద్రతల పరిరక్షణకే కాకుండా ప్రకృతి సంరక్షణకు సంబంధించిన కార్యక్రమాల్లో కూడా చురుకుగా పాల్గొంటుందని పేర్కొన్నారు.

ప్రభుత్వ ఆదేశాలకు అనుగుణంగా జిల్లా వ్యాప్తంగా ఇలాంటి పర్యావరణహిత కార్యక్రమాలను నిరంతరం నిర్వహిస్తూ ప్రజల్లో అవగాహన పెంపొందించేందుకు చర్యలు తీసుకుంటున్నామని తెలిపారు. ప్రతి ఒక్కరూ మొక్కలు నాటి వాటిని సంరక్షించడం ద్వారా భావితరాలకు స్వచ్ఛమైన, సురక్షితమైన పర్యావరణాన్ని అందించాలని పిలుపునిచ్చారు. కార్యక్రమం ముగింపులో పోలీసు అధికారులు, ఫారెస్ట్ డిపార్ట్‌మెంట్ అధికారులు, ఆక్టోపస్ అధికారులు, సిబ్బంది కలిసి మొక్కలు నాటి వాటి సంరక్షణకు కట్టుబడి పనిచేస్తామని సంకల్పం వ్యక్తం చేశారు.