దాడికి ముందు సురక్షిత ప్రాంతానికి లేదా బంకర్లలోకి వెళ్లాలని పదే పదే విజ్ఞప్తి చేసినప్పటికీ అలీ ఖమేనీ నిరాకరించారని విదేశాంగ మంత్రి తెలిపారు. “నా దేశ ప్రజల్లో ప్రతి ఒక్కరికీ సురక్షితమైన స్థలం లభించే వరకు నేను ఎలాంటి షెల్టర్ లేదా సురక్షిత ప్రాంతానికి వెళ్లను. నా ప్రజలకు ఏది జరిగితే నాకూ అదే జరుగుతుంది” అని ఖమేనీ తనతో అన్నట్లు అరాగ్చీ గుర్తుచేసుకున్నారు.

ఇరాన్‌కు పొరుగున ఉన్న గల్ఫ్ దేశాలకు తాము ముందే హెచ్చరికలు జారీ చేశామని అరాగ్చీ స్పష్టం చేశారు. తమపై దాడుల కోసం పొరుగు దేశాల్లోని అమెరికా సైనిక స్థావరాలను (US Military Bases) ఉపయోగించుకోవడానికి అనుమతిస్తే.. ఆయా దేశాలపై ఇరాన్ ఎదురుదాడి చేయడం ఖాయమని ముందే చెప్పామన్నారు. గల్ఫ్ ప్రభుత్వాలు తమ భూభాగాన్ని ఉపయోగించుకోవడాన్ని వ్యతిరేకించినప్పటికీ, వాషింగ్టన్ ఏకపక్షంగా ముందుకు సాగిందని విమర్శించారు. అయినప్పటికీ.. అమెరికా అధ్యక్షుడు డోనాల్డ్ ట్రంప్, ఇజ్రాయెల్ ప్రధాని బెంజమిన్ నెతన్యాహు ఊహించని విధంగా ఇరాన్ అత్యంత శక్తివంతమైన తిరుగుబాటు దాడితో వారిని షాక్‌కు గురిచేసిందని ఆయన అన్నారు.

ఇరాన్ దేశ నాయకత్వ మార్పుపై స్పందిస్తూ.. అలీ ఖమేనీ కుమారుడు మరియు వారసుడైన సయ్యద్ మొజ్తబా ఖమేనీ (Mojtaba Khamenei) ప్రస్తుతం ఇరాన్ పూర్తి అధికారాల పగ్గాలను తన చేతుల్లోకి తీసుకున్నారని అరాగ్చీ స్పష్టం చేశారు. కొత్త సుప్రీం లీడర్‌తో నిరంతరం సంప్రదింపులు సాగుతున్నాయని, ప్రభుత్వ ఆదేశాలు ఎలాంటి అంతరాయం లేకుండా అమలు చేయబడుతున్నాయని చెప్పారు. గత నాయకత్వానికి చూపిన విధేయత మరియు గౌరవమే ప్రస్తుత విప్లవాత్మక కొత్త నాయకుడికి కూడా పూర్తిగా లభిస్తుందని ఆయన తెలిపారు.