ప్రధాని నరేంద్ర మోదీని ఉద్దేశించి లోక్‌సభ ప్రతిపక్ష నేత రాహుల్ గాంధీ చేసిన ‘గద్దార్’ (ద్రోహి) వ్యాఖ్యలు దేశ రాజకీయాల్లో తీవ్ర కలకలం రేపాయి. రాయ్‌బరేలీలో నిర్వహించిన ఓ సభలో రాహుల్ గాంధీ ఈ వివాదాస్పద వ్యాఖ్యలు చేశారు. దీనిపై అధికార బీజేపీ తీవ్రస్థాయిలో విరుచుకుపడింది. రాహుల్ గాంధీ వెంటనే ప్రధాని మోదీకి, దేశ ప్రజలకు బహిరంగ క్షమాపణ చెప్పాలని డిమాండ్ చేసింది. బీజేపీ నూతన అధ్యక్షుడు నితిన్ నబిన్ నేతృత్వంలో కేంద్ర మంత్రులు, సీనియర్ నాయకులు రాహుల్ వైఖరిని తీవ్రంగా తప్పుబట్టారు. వరుస ఎన్నికల ఓటములతో వచ్చిన నైరాశ్యం, నిరాశ వల్లనే రాహుల్ గాంధీ ఇలాంటి అసభ్యకర భాషను వాడుతున్నారని ఆరోపించారు. ఈ వ్యాఖ్యలు ఆయనకున్న విభజన మానసిక స్థితిని, అరాచక ఆలోచనలను స్పష్టం చేస్తున్నాయని మండిపడ్డారు. భారత రాజకీయాల్లో పరస్పర గౌరవానికి ప్రాధాన్యత ఉంటుందని, ప్రధాని పదవిని అవమానించడం అంటే దేశంలోని 140 కోట్ల మంది ప్రజలను అవమానించడమేనని బీజేపీ స్పష్టం చేసింది.