ఈ క్రమంలో తన తండ్రికి అంతిమ సంస్కారాలు నిర్వహించేందుకు అనుమతి ఇవ్వాలని కోరుతూ బోకం అనిల్ పోలీసుల కాళ్లు పట్టుకుని వేడుకున్న ఘటన అక్కడున్న వారిని భావోద్వేగానికి గురి చేసింది. ఈ దృశ్యాలు స్థానికంగా చర్చనీయాంశంగా మారగా, కుటుంబ సభ్యులు తమ పూర్వీకులు దశాబ్దాలుగా అదే స్థలాన్ని శ్మశానవాటికగా వినియోగిస్తున్నారని పేర్కొన్నారు.

అంత్యక్రియలను అడ్డుకోవడంపై ఆగ్రహం వ్యక్తం చేసిన వైఎస్సార్‌సీపీ నాయకులు, కార్యకర్తలు మృతదేహంతోనే రోడ్డుపై ధర్నాకు దిగారు. శ్మశానవాటికగా ఉపయోగిస్తున్న భూమిని ఆక్రమించి, దళిత కుటుంబానికి అంత్యక్రియలు నిర్వహించే హక్కును కూడా నిరాకరిస్తున్నారని ఆరోపించారు. ఈ ఘటనపై అధికార పార్టీ నాయకుల వైఖరిని విమర్శిస్తూ, దళితుల హక్కులను పరిరక్షించాల్సిన అవసరం ఉందని డిమాండ్ చేశారు.

ఈ ఘటనపై స్పందించిన తిరుపతి వైఎస్సార్‌సీపీ ఇన్‌చార్జ్ భూమన అభినయ్ రెడ్డి, శ్మశానవాటికగా వినియోగిస్తున్న భూమిలో అంత్యక్రియలను అడ్డుకోవడం అమానుషమని ఆరోపించారు. మృతదేహంతో వచ్చిన కుటుంబ సభ్యులను, బంధువులను ఇబ్బందులకు గురిచేయడం బాధాకరమని అన్నారు. తమ కుటుంబం తరతరాలుగా ఉపయోగిస్తున్న స్థలంలోనే అంత్యక్రియలు నిర్వహించేందుకు అవకాశం కల్పించాలని ఆయన డిమాండ్ చేశారు.

ఇరువర్గాల మధ్య వాగ్వాదం తీవ్రరూపం దాల్చడంతో సమాచారం అందుకున్న పోలీసులు సంఘటనా స్థలానికి చేరుకుని పరిస్థితిని అదుపులోకి తీసుకురావడానికి ప్రయత్నించారు. ఎలాంటి అవాంఛనీయ ఘటనలు జరగకుండా అదనపు పోలీసు బలగాలను మోహరించి ఇరువర్గాలను శాంతింపజేశారు. ఈ ఘటన తిరుపతిలో రాజకీయ, సామాజిక వర్గాల్లో తీవ్ర చర్చకు దారితీయగా, శ్మశానవాటిక భూమిపై నెలకొన్న వివాదానికి సంబంధించి అధికారుల చర్యలపై అందరి దృష్టి నెలకొంది.