నాటో సదస్సులో మాట్లాడుతూ, వ్యూహాత్మకంగా అత్యంత కీలకమైన హోర్ముజ్ జలసంధిలో నౌకలపై ఇరాన్ జరిపిన దాడులు తాత్కాలిక కాల్పుల విరమణ ఒప్పందాన్ని ఉల్లంఘించినట్లేనని ట్రంప్ ఆరోపించారు. “ఇరాన్ చేస్తున్న చర్యలపై నేను సంతోషంగా లేను. ఇది ప్రభుత్వ మార్పు (Regime Change) గురించి కాదు. కానీ ఇరాన్ అణ్వాయుధాలను పొందడం మాకు అస్సలు ఇష్టం లేదు. హోర్ముజ్ జలసంధిలో ఇరాన్ జరిపిన దాడులు తాత్కాలిక ఒప్పందానికి విరుద్ధం. మా ఒప్పందం ప్రకారం ఇరాన్ తన అణు కార్యక్రమాన్ని నిలిపివేయాలి. లేకపోతే మేమే దాన్ని నిలిపివేస్తాం” అని ట్రంప్ హెచ్చరించారు.

ఇంతకుముందు రోజే ట్రంప్, అమెరికా-ఇరాన్ మధ్య జరిగిన అవగాహన ఒప్పందం (MoU) నుంచి అమెరికా వైదొలుగుతున్నట్లు ప్రకటించారు. అయితే, భవిష్యత్తులో చర్చలకు అవకాశం మాత్రం పూర్తిగా మూసివేయలేదని కూడా చెప్పారు. ఇదే సమయంలో హోర్ముజ్ జలసంధిలో వాణిజ్య నౌకలపై ఇరాన్ దాడులు జరపడంతో మళ్లీ యుద్ధ పరిస్థితులు తలెత్తే అవకాశాలపై ప్రపంచవ్యాప్తంగా ఆందోళనలు పెరిగాయి.

హోర్ముజ్ జలసంధిపై తమకే నియంత్రణ ఉండాలని ఇరాన్ స్పష్టం చేస్తోంది. ఈ మార్గంలో ప్రయాణించే నౌకల నుంచి రుసుము వసూలు చేస్తామని, తమ అనుమతించిన మార్గం నుంచి తప్పుకుంటే ఆ నౌకలను లక్ష్యంగా చేసుకుంటామని హెచ్చరిస్తోంది. గత కొన్ని రోజుల్లో ఇరాన్ సైన్యం కనీసం మూడు నౌకలపై దాడులు చేసినట్లు సమాచారం. దీనికి ప్రతిస్పందనగా మంగళవారం అమెరికా ఇరాన్ లక్ష్యాలపై విస్తృత స్థాయిలో దాడులు జరపగా, అనంతరం ఇరాన్ గల్ఫ్ ప్రాంత దేశాలపై ఎదురుదాడులు చేపట్టినట్లు నివేదికలు వెల్లడిస్తున్నాయి.

అంతేకాకుండా, “ఇరాన్‌ను వెనిజులా లేదా అమెరికా ఇష్టానుసారం చర్యలు తీసుకునే ఇతర బలహీన దేశాలతో పోల్చడం పెద్ద అపోహ. ఇక్కడ అలాంటి పరిస్థితి లేదు. ఇరాన్ తన సార్వభౌమత్వాన్ని కాపాడుకునే సామర్థ్యం కలిగిన దేశం” అంటూ ట్రంప్‌కు సయ్యారి ఘాటు హెచ్చరికలు జారీ చేశారు.