రాడిసన్ హోటల్ నుంచి డీఎల్ఎఫ్ మీదుగా ట్రిపుల్ ఐటీ (IIIT) జంక్షన్ వైపు వెళ్లే వాహనదారులకు ప్రత్యేక దారి మళ్లింపులు ఏర్పాటు చేశారు. ఈ మార్గంలో వచ్చే వాహనాలను కేవలం డీఎల్ఎఫ్ గెట్ నంబర్ 1 వరకే అనుమతిస్తారు. ఆ తర్వాత ముందుకు వెళ్లేందుకు దారి పూర్తిగా మూసివేశారు. కాబట్టి ప్రయాణికులు ప్రత్యామ్నాయ మార్గాలను ఎంచుకోవాల్సి ఉంటుంది. వీరు గచ్చిబౌలి జంక్షన్ మీదుగా వెళ్లి ఇందిరానగర్ వద్ద కుడివైపుకు తిరిగి ట్రిపుల్ ఐటీ జంక్షన్ చేరుకోవాలని అధికారులు సూచించారు. ఈ మార్పులను గమనించి ముందుగానే ప్రయాణ ప్రణాళిక సిద్ధం చేసుకోవడం ఉత్తమం. ట్రాఫిక్ సిబ్బంది ఎప్పటికప్పుడు అక్కడ ఉండి వాహనాలను దారి మళ్లిస్తూ సహాయపడతారు.

ఈ ఫ్లైఓవర్, అండర్ పాస్ నిర్మాణ పనులు పూర్తిగా ముగియడానికి కనీసం ఏడాది సమయం పట్టే అవకాశం ఉందని అధికారులు అంచనా వేస్తున్నారు. ఈ సుదీర్ఘ కాలం పాటు ట్రిపుల్ ఐటీ జంక్షన్ చుట్టుపక్కల ప్రాంతాల్లో భారీగా ట్రాఫిక్ రద్దీ ఏర్పడే ప్రమాదం పొంచి ఉంది. అందుకే ప్రయాణికులు ముఖ్యంగా ఐటీ ఉద్యోగులు ప్రత్యామ్నాయ మార్గాలను ఉపయోగించాలని సైబరాబాద్ ట్రాఫిక్ పోలీసులు విజ్ఞప్తి చేశారు. ట్రాఫిక్ సమస్యల్లో చిక్కుకుని ఆఫీసులకు వెళ్లే సమయంలో వృథా చేసుకోకుండా ముందుగానే వేరే రూట్లలో గమ్యస్థానాలకు చేరుకోవాలని సూచించారు. నగర అభివృద్ధి కోసం జరుగుతున్న ఈ పనులకు వాహనదారులు, ప్రజలంతా తమ వంతు సహకారం అందించాలని కోరారు.