గుండె మార్పిడి ప్రక్రియలో ప్రతి నిమిషం ఎంతో కీలకమైన నేపథ్యంలో, ఎయిర్ అంబులెన్స్ అందుబాటులో లేకపోవడంతో టీటీడీ రవాణా విభాగానికి చెందిన వాహనంలో సెప్టెంబరు 20న మధ్యాహ్నం 3 గంటలకు గుంటూరు నుంచి గుండెను రోడ్డుమార్గంలో తిరుపతికి తరలించారు. శ్రీ పద్మావతి చిన్నపిల్లల హృదయ చికిత్సా కేంద్రానికి చెందిన ఫిజీషియన్ అసిస్టెంట్ విజయ్, పెర్ఫ్యూషనిస్ట్ శ్యామ్ బాబు గుండెతో పాటు ప్రయాణిస్తూ, మార్గమధ్యంలో వైద్య బృందంతో నిరంతరం సమన్వయం చేశారు. సుమారు నాలుగు గంటల వ్యవధిలో సాయంత్రం 7 గంటలకు గుండె తిరుపతికి చేరుకుంది. గుండె ఆసుపత్రికి చేరుకున్న వెంటనే వైద్య బృందం మార్పిడి ప్రక్రియను ప్రారంభించి, సుమారు ఎనిమిది గంటలపాటు అత్యంత సంక్లిష్టంగా నిర్వహించిన శస్త్రచికిత్సను విజయవంతంగా పూర్తి చేసింది.

ఈ గుండె మార్పిడి శస్త్రచికిత్సను శ్రీ పద్మావతి చిన్నపిల్లల హృదయ చికిత్సా కేంద్రం డైరెక్టర్ డా. ఎన్. శ్రీనాథ్ రెడ్డి సమన్వయంతో, చీఫ్ కార్డియాక్ సర్జన్ డా. దీపేష్ త్రివేది నేతృత్వంలో నిర్వహించారు. కార్డియాక్ అనస్థీషియాలజిస్ట్ డా. మధు యాదవ్‌తో పాటు కార్డియాక్ సర్జన్లు, కార్డియాలజిస్టులు, ఇంటెన్సివిస్టులు, పెర్ఫ్యూషనిస్టులు, నర్సింగ్ సిబ్బంది, ట్రాన్స్‌ప్లాంట్ బృందాలు సమష్టిగా కృషి చేసి ఈ క్లిష్టమైన గుండె మార్పిడి ప్రక్రియను విజయవంతం చేశారు. ప్రస్తుతం బాలిక వైద్యుల నిరంతర పర్యవేక్షణలో చికిత్స పొందుతోంది..

తిరుమల శ్రీవారి బ్రహ్మోత్సవాల వేళ ఒకవైపు లక్షలాది మంది భక్తులకు వివిధ సేవలను అందిస్తూ, మరోవైపు ఒక చిన్నారి ప్రాణాన్ని నిలబెట్టేందుకు టీటీడీ వైద్య బృందం విశేషంగా కృషి చేసింది. దాత కుటుంబం తీసుకున్న మానవతా నిర్ణయం, గుండెను సకాలంలో తరలించిన రవాణా బృందం సమయపాలన, వైద్య నిపుణుల సమష్టి కృషి కలిసి 14 ఏళ్ల బాలికకు కొత్త జీవితానికి నాంది పలికాయి. అవయవదానం ద్వారా ఒక ప్రాణం మరొక ప్రాణానికి ఆశగా నిలుస్తుందనే సందేశాన్ని ఈ గుండె మార్పిడి మరోసారి చాటిచెప్పింది.