మంతెన సూర్య‌నారాయణ అలియాస్‌ సూరి (అల్ల‌రి న‌రేశ్‌) కుటుంబం తరతరాలుగా ‘రంభ ఊర్వ‌శి మేన‌క డ్రామా కంపెనీ’ని నడుపుతుంటుంది. వీరి వద్ద ఒక పురాతనమైన మ్యాజిక్ బుక్ ఉంటుంది. ఆ పుస్తకంపై ముగ్గు వేస్తే సాక్షాత్తూ దేవలోకం నుంచి రంభ, ఊర్వ‌శి, మేన‌కలు దిగి వచ్చి కోరిన కోరిక‌ల‌న్నీ తీర్చేస్తారనేది వారి ప్రగాఢ న‌మ్మ‌కం. అయితే, ఆ బుక్‌ను న‌మ్ముకున్న సూరి కుటుంబం అప్పుల ఊబిలోకి కూరుకుపోతుంది తప్ప పైనుంచి ఎవరూ దిగిరారు. మరోవైపు, చిన్నప్పటి నుంచి సినిమాల్లో హీరో కావాలని కలలు కనే సూరి, కష్టపడకుండా కేవలం ఆ మ్యాజిక్ బుక్ పేరు చెప్పి ఊరందరి వద్దా అప్పులు చేస్తుంటాడు.

అప్పుల బాధలు తీవ్రమవుతున్న తరుణంలో, సూరి త‌ల్లి అనారోగ్యంతో మంచం ప‌డుతుంది. ఆమె ప్రాణాలు కాపాడాలంటే వైద్యానికి రూ.ల‌క్ష‌లు అవ‌స‌రం అవుతాయి. చేతిలో చిల్లిగవ్వ లేక, ఏం చేయాలో దిక్కు తోచ‌ని పరిస్థితుల్లో ఉన్న సూరి, చివరి ప్రయత్నంగా మ‌రోసారి ఆ మేజిక్ బుక్‌పై ముగ్గు వేస్తాడు. అనూహ్యంగా ఆ పుస్తకం తెరుచుకుని, నిజంగానే రంభ, ఊర్వ‌శి, మేన‌కలు భూలోకానికి దిగొస్తారు. ఆ తర్వాత సూరి కోరికలు నెరవేరాయా? అప్సరసల రాకతో చోటుచేసుకున్న పరిణామాలు ఏంటి? అనేది మిగతా కథ.