యూరీ ఆర్మీ బేస్‌పై జరిగిన ఉగ్రదాడికి ప్రతీకారంగా చేపట్టిన ఈ మెరుపు దాడులు.. దశాబ్దాలుగా ఉగ్రవాద దాడుల వల్ల భారత్ అనుభవించిన తీవ్ర ఆవేదనకు ధీటైన సమాధానమని పేర్కొన్నారు. ఉగ్రవాదంపై భారత్ ‘జీరో టాలరెన్స్’ (సహించేది లేదనే) విధానాన్ని పాటిస్తోందని, ఉగ్ర చర్యలకు కఠిన రీతిలో బదులిస్తామని తేల్చిచెప్పారు.

గత ప్రభుత్వాల తీరును ప్రస్తావిస్తూ.. ఒకప్పుడు దేశంలో వరుస బాంబు పేలుళ్లు నిత్యకృత్యంగా ఉండేవని, 2008 ఢిల్లీ వరుస పేలుళ్లు, 26/11 ముంబై దాడుల్లో ఎందరో అమాయకులు ప్రాణాలు కోల్పోయారని మోదీ గుర్తుచేశారు. అప్పట్లో ఉగ్రదాడి జరిగినప్పుడల్లా పాకిస్థాన్‌పై చర్యలు తీసుకోవాలని డిమాండ్లు వచ్చినా నాటి పాలకులు పట్టించుకోకుండా కాలం గడిపేవారని విమర్శించారు. కానీ నేటి నవ భారతం మాత్రం ఉగ్రవాదాన్ని కూకటివేళ్లతో పెకిలించేలా ముందుకు సాగుతోందని, దాని ఫలితాలు కళ్లముందే కనిపిస్తున్నాయని చెప్పారు.

ఇదే కార్యక్రమంలో దేశవ్యాప్తంగా జరుగుతున్న జనగణనపై ప్రధాని మాట్లాడుతూ.. మొదటి దశలో ఇప్పటికే 32 కోట్లకు పైగా కుటుంబాల వివరాలు నమోదయ్యాయని, 2.6 కోట్ల మంది ఆన్‌లైన్‌లో స్వయంగా వివరాలు నమోదు చేసుకున్నారని తెలిపారు. అక్టోబర్ 2న గాంధీ జయంతి సందర్భంగా స్వచ్ఛతా కార్యక్రమాల్లో పాల్గొనాలని పిలుపునిస్తూ, ఆంధ్రప్రదేశ్‌లో పురాతన మెట్ల బావులను పునరుద్ధరిస్తున్న యువతను ప్రశంసించారు. యువత మత్తుపదార్థాలకు దూరంగా ఉండేలా ‘నశా ముక్త్ యువ అభియాన్’లో భాగస్వాములు కావాలని కోరారు.