ఇజ్రాయెల్‌ అధికారులు, మీడియా కథనాల ప్రకారం దాడికి పాల్పడ్డారని ఆరోపణలు ఎదుర్కొంటున్న కో-పైలట్‌ ఒమన్‌ జాతీయుడిగా గుర్తించారు. మరో పైలట్‌ యునైటెడ్‌ అరబ్‌ ఎమిరేట్స్‌కు చెందినవాడని నివేదికలు చెబుతున్నాయి. అయితే ఈ ఘటనకు సంబంధించిన పూర్తి వివరాలు ఇంకా దర్యాప్తులోనే ఉన్నాయి. ఇజ్రాయెల్‌ అధికారులు ఇది ఉద్దేశపూర్వక చర్య అయి ఉండొచ్చనే కోణంలో కూడా విచారణ చేస్తున్నారు. కో-పైలట్‌కు ఇజ్రాయెల్‌ వెళ్లే విమానంలో పనిచేసేందుకు అనుమతి ఎలా లభించిందన్న అంశంపైనా పరిశీలన జరుగుతోంది.

విమానం దుబాయ్‌ నుంచి బయలుదేరిన కొంతసేపటి తర్వాత కాక్‌పిట్‌ నుంచి అరుపులు వినిపించాయని ప్రయాణికులు తెలిపారు. ఒక ప్రయాణికురాలు కాక్‌పిట్‌ వద్దకు వెళ్లి రక్తం కనిపించడంతో సహాయం కోసం కేకలు వేసినట్లు చెప్పింది. దీంతో కొందరు ప్రయాణికులు, విమాన సిబ్బంది లోపలికి వెళ్లి దాడి చేసిన వ్యక్తిని అదుపులోకి తీసుకునేందుకు ప్రయత్నించారు. మరో ప్రయాణికుడి కథనం ప్రకారం, విమానం ఒక్కసారిగా వేగంగా కిందకు దిగడం ప్రారంభించడంతో ముందు వరుసల్లో ఉన్న కొందరు ప్రయాణికులు కాక్‌పిట్‌లోకి వెళ్లి పైలట్లకు సహాయం చేశారు.

విమానంలో ఆఫ్‌డ్యూటీలో ఉన్న మరో ఇద్దరు పైలట్లు కూడా పరిస్థితిని అదుపులోకి తీసుకోవడంలో కీలకంగా వ్యవహరించినట్లు నివేదికలు చెబుతున్నాయి. దాడి చేసిన వ్యక్తిని కాక్‌పిట్‌ నుంచి బయటకు తీసుకొచ్చిన అనంతరం వారిలో ఒకరు విమాన నియంత్రణ బాధ్యతలు చేపట్టినట్లు ప్రయాణికులు తెలిపారు. అత్యవసర పరిస్థితి కారణంగా విమానం ఇజ్రాయెల్‌కు వెళ్లకుండా సౌదీ అరేబియాలోని తాబుక్‌కు మళ్లింది. తాబుక్‌ విమానాశ్రయానికి అత్యవసర ల్యాండింగ్‌ అభ్యర్థన అందడంతో అక్కడ అధికారులు అప్రమత్తమయ్యారు. ఇద్దరు పైలట్లను చికిత్స కోసం ఆసుపత్రికి తరలించారు.

ఈ ఘటనలో కెప్టెన్‌ భారతీయుడని కొన్ని ఇజ్రాయెల్‌ మీడియా కథనాలు పేర్కొన్నాయి. అయితే పైలట్ల జాతీయతపై వివిధ మీడియా సంస్థల్లో భిన్నమైన వివరాలు వెలువడుతున్నాయి. అందువల్ల భారతీయ కెప్టెన్‌ అంశాన్ని కూడా ప్రస్తుతానికి నివేదికల ఆధారంగానే చూడాల్సి ఉంటుంది. ఇదే సమయంలో గాయపడిన పైలట్‌కు విమానంలో ప్రయాణిస్తున్న ఒక ఇజ్రాయెల్‌ దంత వైద్యుడు ప్రాథమిక చికిత్స అందించి ప్రాణాలు కాపాడేందుకు సహకరించినట్లు ప్రయాణికులు తెలిపారు.

కాక్‌పిట్‌లో జరిగిన ఘటన అనంతరం విమానం అత్యవసర సంకేతాలు పంపింది. అందులో అక్రమ జోక్యానికి సంబంధించిన సంకేతం కూడా ఉండటంతో హైజాక్‌ అనుమానాలు తలెత్తాయి. విమానం భారీగా కిందకు దిగినట్లు ఫ్లైట్‌ ట్రాకింగ్‌ వివరాలు సూచించాయి. అయితే ఘటనకు అసలు కారణం ఏమిటి, దాడి వెనుక ఉద్దేశం ఏంటి అనే అంశాలు ఇంకా దర్యాప్తులో ఉన్నాయి. ఫ్లైదుబాయ్‌ మాత్రం విమానంలో ఘటన చోటుచేసుకున్నట్లు ధృవీకరించి, ప్రయాణికులంతా సురక్షితంగా ఉన్నారని తెలిపింది.